Tuwò môsz prôwda, rozmiejemë tã diskùsëjã czësto jinaczi Dlô mie nôwôżniészi je, żebë wërobic wespólné zdanie prawie dzãka kònsensusowi. A choba wiémë co òznôczô to słowò. Na gwës nie òznôczô, że nie mòże dawac niżódnëch bôczënków, kò tak to jaczi je sens dôwac ne wskôzë do diskùsëji? Żebë so zachwëcëc sztélem pisanégò? Célã dokôzu, jakno gwës sóm mòżesz letkò przeczëtac je "uniknięcie zniechęcenia do pisania po kaszubsku z powodu istnienia w różnych ośrodkach różnych, niezgodnych z sobą rozwiązań" a jakno ma mòżema wprowadzëc rozwiązanié wzãté z Windowsa ë dlô niegò zaprojektowóné? Napisac do ùsôdzców/distribùtorów Linuksa, żebë zmienile filozofijã wstawianiô céchù €? W dzélu "charakter dokumentu" téż je cos ò jednym (wespólnym) rozwiązanu. Żelë mô bëc wespólné to dôch róbma tak, żebë tak bëło.

Mòże ce logiczné argùmentë nie lubią (tak môsz napisóné), téj nie rozmiesz, żé jidze ò to bë miec jeden wespólny fòrmat (rozmiã, że jidze ju blós ò klawiaturã) a nié dwie klawiaturë pl+csb z jinyma môlama dwóch céchów. Sztandard to tuwò kluczowé słowò.

Nawetka eżlë wedle ce brëkòwnice Linuksa czë jinëch mniészëch systemów nie są wôżni, to dlôczë nie dac jima mòżlewòtë pisania na taczi sami klawiaturze jakno w Windowse? Sztandard to nie je blós to co wëmëszle jedna firma. Nama jidze ò to, żebë bëło "juwerno" we wszëtczéch systemach. Nie do òminãcô je téż fakt, że jak narô mómë le jedną kaszëbioną systemã, téj dôwô to szansã na to, że westrzódka Kaszëbów bãdze òna testowónô, mòże brëkòwónô (chto wié...?). Ë gwësno ti Kaszëbi co mdą to robile, téż bë chcele miec mòżlewòtã brëkòwania klawiaturë pl+csb. Ma chcema dac jima taką mòżlewòtã, leno chcema tuwò ùsôdzëc jeden sztandard dlô tegò ôrtu klawiaturë, tak bë letkò szło ją dodôwac do infòrmatikòwëch systemów. Sztandardã nie je wëmùszanié rozwiązania tipicznegò blós dlô jedny starnë, le kònsensus, ò jaczim dôch sóm môsz napisóné.

Jô mëszlã, że të całi czas nie rozmiesz, że nie jidze ju ò to, bë wprowadzëc klawiaturã csb jakò przédné rozwiązanie do wskôzów, leno bë dac szansã na wprowadzenié jednegò, dobregò ùstôwu klawiaturë do wszëtczéch systemów do jaczich je taka mòżlewòta. Niech mdze to pl+csb, leno niech mdze to klawiatura dopasowónô do wicy systemów. Ë nie róbma z € taczi wôżné sprawë, to nie je ë nie mdze nôczãsczi brëkòwóny céch. Nawetka wëstrzód eùropejsczéch Kaszëbów.