PIĄTK
ANTIFONA NA WEŃDZENIÉ
Hewò Pón przińdze w majestace, * żebë przëniesc pòkój swòjémù lëdowi * i òbdarzëc gò żëcym wiecznym.
KÒLEKTA
Òkôżce, Panie swòjã pòtãgã i przëbądzce, + niech Wasza òpieka wëzwòli nas òd niebezpiekù, jaczi zagrôżô nama z przëczënë naszëch grzéchów. * A Wasza mòc niech naju zbawi, Panie, jaczi żëjece i królëjece na wieczi wieków.
PIERSZÉ CZËTANIÉ
Iz 29, 17-24
W nym dniu òczë slepëch bądą widzałë.
Czëtanié z Knédżi proroka Izajasza.
To mówi Pón Bóg: „Czë nié w krótczim ju czasu Liban zmieni sã w ògród, a ògród za bór mdze ùznóny? W nen dzéń głëchi ùczëją słowa knédżi, a òczë slepëch wòlné òd smrokù i òd cemnicë, bądą widzałë.
Ny pòkórny jesz barżij rozredëją sã w Panu, i ny nôbiédniészi rozwieselą sã w Swiãtim Izraela, bò nie mdze ju gnãbicela, zdżinie rągała, i mdą wëtãpiony ny wszëtcë, co są wcygniony w zlecziństwò: chtërny słowã prowadzą kògòs do grzéchù, chtërny we wierzejach zastôwiają sydła na sãdzów, i sprawiedlëwégò òdprôwiają précz z niczim.
Dlôte tak mówi Bóg domôctwa Jakùba, chtëren òdkùpił Abrahama: "Òdnąd Jakùb nie mdze sã sromił ani jegò twôrz ju nie zbladnie, bò czej ùzdrzą swòje dzecë, ùczink mòjëch rãk, strzód sebie, tej ògłoszą mòje miono jakò swiãté.
Tedë bądą tczëlë Swiãtégò Jakùbòwégò i z bòjącoscą mdą mielë w ùwôżanim Bòga Izraela". Ny, co błądzëlë dëchã pòznają mądrosc, a ny, co szemrelë przëjimną pòùczenié”.
To je słowò Bòżé.
PSALM RESPONSORIJNY
Ps 27 (26)
Refren: Pón je mòjim widã i mòjim zbawienim.
Pón je mòjim widã i mòjim zbawienim *
kògò jô bë sã miôł lãkac?
Pón je òbrońcą mòjégò żëcô, *
kògò jô bë sã miôł bòjec?
Refren.
Ò jedno jô le proszã Pana, ò to móm starã: +
żebë jem móg bëc wiëdno ù Niegò doma *
òb wszëtczé dnie żëcégò,
żebë jem zaznôwôł łaskawòtë Pana, *
wiëdno sã redowôł Jegò swiątinią.
Refren.
Jô wierzã, że mdã òbzérôł dobra Pana *
w krôjnie żëjącëch.
Czekôj na Pana, bãdzë dzyrzczi, *
nabierzë òdwôdżi a żdżë na Pana.
Refren.
SPIÉW PRZED EWANIELËJĄ
Alleluja, alleluja, alleluja.
Hewò nasz Pón przińdze z mòcą
i òswiécy òczë swòjëch słëgòw.
Alleluja, alleluja, alleluja.
EWANIELËJÔ
Mt 9, 27-31
Ùzdrowienié slepëch, co ùwierzëlë w Jezësa.
Słowa Ewanielëji wedle swiãtégò Mateusza.
Czej Jezës przechòdzył, szlë za Nim dwaji slepi, co głosno wòłelë: „Zmiłuj sã nad nama, Sënie Dawida!” Czej le wszedł do chëczë, ny slepi przëstąpilë do Niegò, a Jezës sã jich spitôł: „Wierzita wa, że Jô mògã to zrobic?” Òni Mù òdpòwiedzelë: „Jo, Panie!” Tej dotk jich òczu a rzekł: „Niech wama sã stónie pòdług waji wiarë” Tej òczë sã jima òtemkłë, a Jezës òstro jima przëkôzôł: „Bôczta, cobë sã ò tim chto nie dowiedzôł!” Ale òni, czej le wëszlë, roznioslë wiédzą ò Nim pò całim tamecznym òkòlim.
To je słowò Pańsczé.
Mòdlëtwa wiérnëch
MÒDLËTWA NAD DARAMA
Wszëtkòmògący Bòże, dôj sã przebłagac naszima pòkórnyma mòdlëtwama i òfiarama, + a dlôte, że më ni mómë zasłëgów, jaczé mògłëbë nas ùsprawiedlëwiac przed Tobą, * wspòmòżë nas swòją łaską. Przez Christusa Pana najégò.
Prefacjô nr 1
NTIFONA NA KÒMÓNIÃ
Przër. Flp 3, 20-21
Spòdzéwómë sã przińdzeniô Zbawicela, Jezësa Christusa, * chtëren przejinaczi najé smiërtelné cało * na pòdobã swégò, ùwielbionégò cała.
MÒDLËTWA PÒ KÒMÓNII
Pòkrzésony ną dëchòwą Strawą pòkórno błagómë cã, Bòże, + sprawi, żebë jesmë przez ùdzél w Eucharistëji naùczëlë sã mądrze szacowac doczasné dobra * i miłowac dobra wieczné. Przez Christusa, Pana najégò.
|
