WTÓRK
ANTIFONA NA WEŃDZENIÉ
Przër. Za 14, 5. 7
Hewò przińdze Pón i z Nim wszëtcë Jegò swiãti; * tegò dnia wiôldżi wid zajasnieje.
KÒLEKTA
Bòże, Të jes òbiécôł zesłac Zbawicela wszëtczim lëdóm
zemi, * sprawi, żebë jesmë z redoscą żdelë na swiãto Jegò Narodzeniô. Przez najégò Pana Jezësa Christusa.
PIERSZÉ CZËTANIÉ
Iz 40, 1-11
Pasturz nosy jagniãta na piersach.
Czëtanié z Knédżi proroka Izajasza.
"Pòceszta, pòceszëta mój lud!" mówi waji Bóg. "Przemawiôjta do sërca Jeruzalem i wòłôjta do niegò, że czas jegò służbë sã skùńcził, że jegò nieprawòta je òdpòkùtowónô, bò òno òdebrało z rãczi Pana pòdwójną karã za wszëtczé swòje grzéchë". Głos sã rozlégô: "Przëszëkùjta na pùstini wërównôjta na bezludkòwim drogã naszémù Bògù! Niech sã pòdniosą dolëznë, a wszëtczé górë i grzëpë òbniżą; rówizną niech sã stóną ùrzmë, a przitczé ùbiedrza głôdką niżawą.
Tedë sã òbjawi chwała Pana, ùzdrzi jã kòżdé cało, bò to mają rzekłé wardżi Pana". Głos sã od'zéwô: "Wòłôj!" - A jô rzekł: Co móm wòłac? - "Wszelejaczé cało to je jakbë trôwa, a wszednô jegò snôżota to je jakbë pólny kwiat. Trôwa ùsychô, wiãdnie kwiat, czej na nie wiater Pana pòwieje. Prôwdzëwie nen nôród to je takô trôwa. Trôwa ùsychô, kwiat wiãdnie, ale słowò Bòga naszégò trwô na wieczi".
Wstãpiże na wësoką górã, zwiastunkò dobri nowinë w Syjonie! Pòdniesë mòcno twój głos, zwiastunkò dobri nowinë w Jeruzalemie! Pòdniesë głos, nie bój sã! Pòwiédz miastóm judzczim: "Hewò waji Pón, Bóg!" Hewò waji Pón, Bóg, przëchòdzy z mòcą i swòjim remieniã Òn panëje. Hewò Jegò nôdgroda z Nim jidze i przed Nim Jegò zôpłata. Jiwerno pasturz pase swòjã rótã, gromadzy jã swòjim remieniã, jagniãta nosy na swòjëch piersach, a kôrmiącé òbagnice prowadzy òstróżno.
To je słowò Bòżé.
PSALM RESPONSORIJNY
Ps 96 (95)
Refren: Hewò nasz Pón Bóg przińdze z wiôlgą mòcą.
Spiewôjta Panu piesń nową, *
spiewôj Panu, całô zemio.
Spiéwta Panu, słôwta Jegò miono, *
kòżdégò dnia głosëta Jegò zbawienié.
Refren.
Głosta Jegò chwałã westrzód nôrodów wszëtczich
rozpòwiadôjta ò Jegò cëdach strzód wszëtczich lëdów.
Głosëta strzód lëdów, że Pón je królã, *
a bądze sprawiedlëwie sądzył lëdë.
Refren.
Niech sã redëje niebò i wieseli zemia, *
niech szëmi mòrze i wszëtkò, co je napełniwô;
niech sã ceszą pòla i wszëtkò, co na nich rosce, *
niech wszëtczé drzewa w lasach krzikają z redoscë.
Refren.
Przed òbliczim Pana, chtëren ju sã zbliżô, *
chtëren nadchòdzy, żebë sãdzëc zemiã.
Òn mdze sądzył swiat sprawiedlëwie, *
a nôrodë pòdług swòji prôwdë.
Refren.
SPIÉW PRZED EWANIELËJĄ
Alleluja, alleluja, alleluja.
Bliskò je dzéń Pana,
hewò Òn przińdze, żebë nas zbawic.
Alleluja, alleluja, alleluja.
EWANIELËJÔ
Mt 18, 12-14
Bóg nie chce zôgùbë zbłądzonëch.
Słowa Ewanielëji wedle swiãtégò Mateusza.
Jezës rzekł do swòjëch ùczniów: „Jakùż wa mëslita? Żelë chto mô sto òwc, a jedna z nich zbłądzy, nie òstawi òn na górach nëch dzewiãcdzesąt dzewiãc i nie pùdze szëkac ti, co je zbłądzonô? A żelë mù sã ùdô jã nalezc, pò prôwdze pòwiôdajã wama: ceszi sã ji barżi jak nym dzewiãcdzesąt dzewiãc, co nie zbłądzëłë. Tak téż waji Òjc, co je w niebie, ni mô wòlë, żebë zdżinãło jedno z nëch malinczich”.
To je słowò Pańsczé.
Mòdlëtwa wiérnëch
MÒDLËTWA NAD DARAMA
Wszëtkòmògący Bòże, dôj sã przebłagac naszima pòkórnyma mòdlëtwama i òfiarama, + a dlôte, że më ni mómë zasłëgów, jaczé mògłëbë nas ùsprawiedlëwiac przed Tobą, * wspòmòżë nas swòją łaską. Przez Christusa Pana najégò.
Prefacjô nr 1
ANTIFONA NA KÒMÓNIÃ
Przër. 2 Tm 4, 8
Bóg, sprawiedlëwi sãdza, * wëwińcëje zbawienim nëch, co ùmiłowelë Jegò przińdzenié.
MÒDLËTWA PÒ KÒMÓNII
Pòkrzésony ną dëchòwą Strawą, pòkórno błagómë Cã, Bòże, + sprawi, żebë jesmë przez ùdzél w Eucharistëji naùczëlë sã mądrze szacowac doczasné dobra * i miłowac dobra wieczné. Przez Christusa, Pana najégò.
|
