SOBÒTA
ANTIFONA NA WEŃDZENIÉ
Ps 80 (79), 2. 4
Przëbądzce, Panie, co królëjece w niebie, * i òkôżce swòje òbliczé, * a më bądzemë zbawiony.
KÒLEKTA
Wszëtkòmògący Bòże, niech w najëch sërcach zajasnieje jasnota Twòji chwałë + i rozwidni cemżą grzéchù, * żebë w sztërkù przińdzeniô Twòjégò Sëna òkôzało sã, że më jesmë dzecama widu. Przez najégò Pana Jezësa Christusa.
PIERSZÉ CZËTANIÉ
Syr 48, 1-4. 9-11
Elijôsz przińdze jesz rôz.
Czëtanié z Knédżi Syracydesa.
Pòwstôł Elijôsz, prorok jak òdżin, a słowò jegò gòrało jak smólnica. Òn głód na nich sprowadzył, a swòją gòrlëwòtą zmniésził jich lëczbã. Słowã Pańsczim zamknął niebò, z niegò téż trzë razë sprowadzył òdżin. Jakùż të jes wsławiony, Elijaszu, przez swòje i chtëż mòże sã pòchwalëc, że tobie je równy? Të, chtëren jes béł wzãti w wichrze ògnia, na wòzu z ògnistima kòniama. Ò tobie je napisóné, że jes zachòwóny na przënôleżné czasë, żebë złagòdzëc górz przed pòmstą, żebë nawrócëc sërce òjca do sëna, i pòkòlenia Jakùba òdnowic. Szczestlëwi są ti, co cebie widzelë, i ti, co pòùsnãlë w miłoce, bò më téż na pewno mdzemë żëlë.
To je słowò Bòżé.
PSALM RESPONSORIJNY
Ps 80 (79)
Refren: Òdnów nas Bòże, i dôj nóm zbawienié.
Pòsłëchôj, Pasturzu Izraela, *
Të, chtëren nad cherubinama zasôdôsz.
Wzbùdzëże swòjã pòtãgã *
i na pòmòc przińdzë nama.
Refren.
Bòże Zôstãpów, przińdzëże nazôd, *
wezdrzë z nieba, przëzdrzë sã i nawiédz nã winową wietwiã.
I chróń to, co zasadza Twòja prawô rãka, *
latorózga, jaką jes ùmòcnił dlô se.
Refren.
Wëcygnij rãkã nad chłopã prawiznë Twòji, *
nad sënã człowieczim, jaczégò jes ùmòcnił w swòji służbie.
Më nie òdstąpimë ju wicy òd Cebie, *
dôj nama nowé żëcé, a bądzemë chwôlëlë Twòje miono.
Refren.
SPIÉW PRZED EWANIELËJĄ
Łk 3, 4.6
Alleluja, alleluja, alleluja.
Przëszëkùjta drogã Panu, proscëta Jemù stegnë;
wszëtcë lëdze ùzdrzą Bòżé zbawienié.
Alleluja, alleluja, alleluja.
EWANIELËJÔ
Mt 17, 10-13
Elijôsz ju przëszedł, a jegò nie pòznelë.
Słowa Ewanielëji wedle swiãtégò Mateusza.
Czej schôdelë z górë ùczniowie sã zapitelë Jezësa: „Czemù ùczałi w Pismionach cwiërdzą, że nôprzód mùszi przińc Elijôsz?” Òn òdrzekł: „Elijôsz pò prôwdze przińdze i wszëtkò ùprawi. Ale pòwiôdajã wama: Elijôsz ju przëszedł, a jegò nie pòznelë i pòstąpilë z nim tak, jak chcelë. Tak téż Człowieczi Syn mdze òd nich cërpiôł”. Tedë ùczniowie przerozmielë, że mówił jima ò Janie Chrzcëcelu.
To je słowò Pańsczé.
MÒDLËTWA NAD DARAMA
Wszëtkòmògący Bòże, sprawi, żebë jesmë bez ùstónkù skłôdelë Tobie najã Òfiarã, + w jaczi zjiscywô sã ùstanowionô przez Cebie krëjamnota Eucharistëji * i dokònywô sã czin naszégò zbawieniô. Przez Christusa, Pana najégò.
Prefacjô nr 1
ANTIFONA NA KÒMÓNIÃ
Ap 22, 12
Hewò Jô wnetka przińdã. * a mòja zôpłata je ze mną, * żebë kòżdémù òdpłacëc wedle jegò ùczinków.
MÒDLËTWA PÒ KÒMÓNII
Prosymë Cã, nôłaskawszi Bòże, + żebë jes mòcą tegò Sakrameńtu òczëszcził naju z lëchëch znãtów i z pòdajnoscë na zło + a przëszëkòwôł do nadchôdającëch swiãt. Przez Christusa, Pana najégò.
|
