Do Betlejem z Kaszëb pòszlë delegatë Mielë pełen kazub i wòrek czubati A w nich bëlë darë Panu na òfiarã, Hej kòlãda, kòlãda!
Bëlë tam gazétczi i wszëtczé dodatczi W miészkù mnodżé dëtczi na wszôlczé wëdatczi I na przësmak wszôlczi chléba bez òsełczi, Hej kòlãda, kòlãda!
Do Betlejem przëszlë srodze zmòrdowòny Bò złômalë diszlã, pòstradalë sanie Przëstąpilë proga, pòchwôlëlë Bòga, Hej kòlãda, kòlãda!
Hej Jezuskù môłi, co tak biednie lezisz, chòca wiéczi całé Galileji wiérzisz A tam w Galileje zëmny wiater wieje Hej kòlãda, kòlãda!
A ù nas to lëdze nié znają nick zdradë, Miôłbës co dzéń slédze i klóséczczi z brzadem Spôłbës na pierzënie a nié rogòżënie, Hej kòlãda, kòlãda!
Pò tim przemòwiéniu rozłożelë darë, "Dzénnik" do czëtaniô i pieniążków miarã, A bòchenk w nôsëpie złożelë przë krëpie, Hej, kólãda, kòlãda!
| Téj Jezusek môłi mòcno głową krãcëł, Aże bëł ju smiałi, darë jich odtrącëł - Nié są dlô Jezëska, wezta dlô biéduska, Hej kòlãda, kòlãda!
Më doch z Kaszubëji strzeżem Pòlsczi granic, Chòc ti z Galileji mają naju za nic A tą naju stróżą mnożim chwôłã Bòżą Hej kòlãda, kòlãda!
"Gazétë nieé czëtóm - Jezësek òdpòwie - I sã waju pëtóm, czë tam prôwda stoji? Ta òmóna swiata wënalôzczém czarta!" Hej, kòlãda, kòlãda!
"Za pieniążczi waju czëstô loterëjô, Dzysô jakbës w raju, witro z gòłą szëją. Za taką walutã nié dostóniesz buta!" Hej kòlãda, kòlãda!
"Waju chlébk jô znajã - i gò rãką głaszcze - Ale mnie ù waju wnet z niégò wëwłôszczą. Wszëtczi waju darë nié są mòji miarë..." Hej, kòlãda, kòlãda!
"Hej, Kaszëbi mili, jeden dôr jô proszã, Bò jô kòżdi chwili do waju sã noszã: Na dzyszészé Gòdë chòc kropelkã zgòdë!" Hej, kòlãda, kòlãda!
|