Forum : Nasze Kaszuby

Użytkownik: Hasło:
Zarejestruj Przypomnij hasło

Forum

Losowe zdjęcie

Pomerania

nr 12/12 poprzednie

Wygląd strony

Strona główna forum

Sprawë

Wëlôc galã II

| Od najnowszych

Poprzedni wątek | Następny wątek | Koniec

Nadawca	Wątek
fopke	wysłane dnia: 16.6.2009 19:57
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Wëlôc galã II Cos w ti maszinie nawalëło i ni ma widzec mòjëch postów na fòrum bez zalogòwaniô- Wëlôc galã. Temù zakłôdóm nowi wątk: Wëlôc galã II Sonet na próbã Szesc pò piąti reno piszã sonet na próbã Liczã, mô bëc trzënôsce szlabizów w lënijce... Pierszô sztrófka zaczãtô, wej, wnetka ji kùńc mdze! (Różnëch rzeczi próbòwôł- to sã mòże ùdac...) Sztërë na bòkù! Nawetk sã dosc zrëmòwało! Pisadło w rãce pewniészé tuńce zaczinô. To dłëgszé słowò, krotszé z mùskù wëdobiwô I ùsôdzô na kôrtce lëtrów réżkã całą... Terô, żebë wiérztë fòrmã zakùńczëc z szëkã Pò trzë do grëpë wersë dëbeltno zestawia (Wnetkã mdze czas wstajac, bë do robòtë nëkac...) Jesz përznã pisaniô i je gòtowé prawie... Nie bëło z tim tak drãgò...! Jeszcze rzucã òkã Na zédżer- trzëdzescë minut! To krótkò zbawia... Tómk Fópka, Chwaszczëno, 15 czerwińca 2009 rokù, gòdz. 5.36 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 22.6.2009 23:35
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II Skwiérczk Wzął, ùniósł w niebò swój łãczk Sztót minie, nim zacznie grac Królk, trôwnych pòmionów pón Skwiércz môłi solo, òn sóm Dzes w dôlą wzérô i... Grô, i grô, i grô miłi skrzëpk Gnô, i gnô, i gnô lëftã wnetk Stroji, stroji, stroji gò lëstk A smëczkã zdebło je... Drgô, i drgô, i drgô strënny zwãk Stoji, stoji, stoji jak graf Broji, broji, broji za piãc Nôskwarnëch mëgów...Lapsk... Spi, letkò zybie gò wiéw Drżi, cos sã skòczkòwi sni Wiém, zwierzny koncert- a w nim Òn. Pierszi grajk łączi niw... Le skwiérczk, skrzëpice i... Grô, i grô, i grô miłi skrzëpk Gnô, i gnô, i gnô lëftã wnetk Stroji, stroji, stroji gò lëstk A smëczkã zdebło je... Drgô, i drgô, i drgô strënny zwãk Stoji, stoji, stoji jak graf Broji, broji, broji za piãc Nôskwarnëch mëgów...Lapsk... Tómk Fópka, Chwaszczëno, 22 czerwińca 2009 rokù, gòdz. 23.19 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 15.7.2009 21:57
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II Trzë pielgrzimkòwé piesnie Chcemë jic Muzyka: Jerzy Stachurski Chtërną drogą mùszã jic, bë dińc do Ce...? Jakô długô je wanoga naszich serc...? Kùli kroków trzeba zrobic, bë rzec: stop!? Wiele lëdzy tądka ju przed nama szło...? Chcemë jic, chcemë przińc w dzyrsczi marsz! Niesce w przódk, wòdzce nas, Òjcze Nasz! Tam, dze krôj; dze je rôj- dze chce Bóg... Żebëm z Nim swiata kùńc ùzdrzec mógł! Nierôz zwątpisz, jes zmãczony, lecysz z nóg... Jes jak Szëmón Pioter, niglë zapiôł kùr... Równak z nôdzeją przëchôdô wiarë wid Z nima miłota je krótkò... i nasz spiéw: Chcemë jic... Tómk Fópka, Chwaszczëno, 15.07.2009 rokù, gòdz. 19.50 Na pielgrzimkã! Bòlą nodżi, kò marsz srodżi Colemało wcyg pòd górkã... Grô krew w żëłach, lëft kąsk chłodzy... Jakbë w piersy miôł skòwrónka... Na pielgrzimkã! Na pielgrzimkã Bierze mëma córkã, synka! Na pielgrzimkã! Na pielgrzimkã Jidze sąsôd i kòlega. Na pielgrzimkã! Na pielgrzimkã Weznã picé, chlébk ze szinką... Na pielgrzimkã! Na pielgrzimkã W mòjim sercu niesã Bòga! Matka Bòskô na nas żdaje Dôwô wszelejaczé łasczi Temù kòżdi dzys rôd gnaje Tak, jak spieszi sã do matczi... Na pielgrzimkã... Ga sã skùńczi ta wanoga Przińdze miłé òdpòcznienié Wnetk zabôczisz, że krziż, noga... Kò pewniészé mdze zbawienié! Na pielgrzimkã... Tómk Fópka, Chwaszczëno, 15.07.2009 rokù, gòdz. 20.05 Marsz do Bòga Muzyka: Jerzy Stachurski Tej le skòcz! Tej le lec! Tej le krąc wkòło sã zdrzącë w niebò! W prawò, hops! W lewò krok! Leno merkôj, bës nie wpôdł dze w rów... Ta pielgrzimka to je taczi marsz do Bòga Jidzesz równo, bës nie darwôł z tëłu biec Jachac leno starszi i tanétë mògą Kòmpaniją garną wszëtcë przez las, wies... Dobrą drogą nas prowadzy ksądz wikary Wkół nie wiónk wcyg rozmòdlonëch brutków je A òrkestra głosno graje piesnie staré Chtos wpôdł w plëtã, zawiôł wiater- sëszi gò... Tej le skòcz... Różné mómë jintencëje, różné sprawë, Jaczé w Swiónowie szczestlëwi mdą miec kùńc: Ten ò zdrowié, na ò dëtczi, lżiszi kawel... Jesz chtos prosy, bë za rok jesz mógł tak jic... Niese swòją prosbã cëchą młodëch pôra Co òstatną z Bòsczich Cnotów zdjãti są To pielgrzimka tak pôrzësto mùlków dobra Chòcô prëczkówka- nad nima słuńca krąg... Tej le skòcz... Tómk Fópka, Chwaszczëno, 15.07.2009 rokù, gòdz. 21.15 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 29.8.2009 12:40
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II Marce merca Czedë wjéżdżôsz na pòdwòrzé Swòjim stôrim cynkò-cënkò Bracô trzimią z bëna dwiérzë Òkno- sromòta òtemknąc... Klepiész dërno, jaż drżą rutë - Pòchwôlony! Marta doma? - Pòj do jizbë! Scygnij bótë! Môta wa ju wëżniwioné? - Mëmka nama co zrëchtëje... Jaką kawã, mòże kùcha... - Pòjkôj, Martkò, je twój bëniel! Czej ju jidzesz- zabij mùchã... - Jo, co ti w tim sejmie czwarzą... Chcą pòdatk- bikòwé wrócëc... - Pòwiéce nóm jinszą razą, Nóm sã spieszi! Nót je zdążëc! - Na pòszëkù! Bãdzta z Bògã! Grzej maszinã! Sadnã z tëłu... Pierszi zôkrãt- chrãszczi w biegach, Òsmëdzesąt- bùfsô kòło... - Film ò piąti je pùszczóny... Dô to radã sã dotrëkac...? Wkòło stronë dobrze znóné, A do miasta tak dalekò... - Jesz nié białka, a ju wadzy!- Ksawér gôdô i wprzódk czadzy Sadzy, nëkô corôz prãdzy Jaż w tim szwągù ò cos zadzôł... Zmòkł sã òn i mòkrô òna Autół w rowie tonie w trôwie - Chwała Bògù! Cud, że żëjã! Tatk mdze złi, czej le sã dowié... Mòje autkò... Tak pùcowôł... Tëli czasu... Wszëtkò na nick... Prosto w rowiskò wkarowôł!- Bez to twòje gãgnotanié!! Co!? Ten rëmtot to wstid lëdzczi! Jô jem wôrt, bë mercã jachac! Co të so, w całoscë mëslisz!?- Szła na bòk i jãła płakac... - Mùlkò- knôp tak „z mitka” zaczął Kò të wiész, że jô ce kòchóm... Bądze merc, le nié òd razu... Z wrëka dëtka nie wëczechlóm...! Ju sã smieją Martë òczë - Ten film bądzemë pamiãtac... Wejle, jiny autół jedze! Scygnij- że gò! I ... dôj rãkã... Tómk Fópka, Chwaszczëno, 29.08.2009 rokù, gòdz. 12.12 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 10.12.2009 11:48
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II Dzéwczã w Americe Móm dzéwczã w Americe Za wiôlgą wòdą, lasã A dzãka satelice Pògôdómë so czasã... - How are you? I am fine- Tak z przënãceniô łżã - The wealther? Rainy? Sun? - It’s foggy day- dôka. - You miss me? Kiss me? Cry? Tak strzédno: all the time - I need you (and so long) - Timczasã! Love you so! Kòl nich sã jindigenów Le w rezerwatach trzimie A ù nas jesz Kaszëba Je colemało friny... - How ... Tej sej nipòcy wiater Antenë zerwie z daków „I’m sorry. Disconnected” Sã zdrzémnã. Z brakù lakù... - How ... Jindigena- pòl. tubylec, autochton Tómk Fópka, Chwaszczëno, 9.12.2009 rokù, gòdz. 23.30 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 10.12.2009 12:17
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II Kaszëbi w Europie Cos mie sã mekcy, w głowie sã sztopie, Że më òd niedz’lë jesmë w Europie... Jenë, chłopie! Më jesmë w Europie! Stolëcã terô mają przeniosłé Jaż do Brukselë- do cze to doszło...?! Jenë, chłopie ... Geje, lesbijczi robią paradë Sztrëjkùją związczi- kò taczé prawò... Jenë, chłopie ... Państwò òbcérô rzëcczi dzecątkóm Tatk ... leno wzérô, mëma ... tu sprzątô... Jenë, chłopie ... Kòżdi socjalné mô przëwileje Czip ce specjalny wszczépią do szëjë... Jenë, chłopie ... Kòscół w biszągù! Nie chce sã wierzëc! Krziżã ... w Strasbùrgù mòżesz pòleżec... Jenë, chłopie ... Czëstô kòmùna! Jistny rôj wnetkã! Tak leno ù nas! Wej, Europejskô! Jenë, chłopie ... Béł Niemc i Ruscë, Pòlskô téż bëła... Nie dô nas radë zmùżdżëc Bruksela! Jenë, chłopie ... Tómk Fópka, Chwaszczëno, 10.12.2009 rokù, gòdz. 00.29 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 11.12.2009 0:06
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II To le jidze ... Béł so Antón, kawalér, wanoga bez dëtka Co dërchã pòwiôdôł: „To le jidze robòta!” W całoscë tej, czej bëło co w pòlu robioné Nadchôdôł, sã stanowił i zmùdzył jak rozmiôł... Przë żniwach, czë bùlwach, sanie, wrëków sadzenim Tëch słów sã wiedno bëło mòżna spòdzôc pò nim - Wez-że, Antonkù, pòmóż! Chwëc hôk, widłë, grable - Jô mùszã jic dodóm, kò to zarô deszcz spadnie ... Tak z sąsôdama mijôł sã Tóna w pòtrzebie Jaż przepôdł dzes, jak to mówią: jak nen kam w wòdã I żódnégò chlëchù pò chłopie bëc- nie bëło A robòta „le jidze”- jak sã òd nie czëło... Tómk Fópka, Chwaszczëno, 11.12.2009 rokù, gòdz. 00.03 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 15.12.2009 15:10
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II Balada ò Brunkù Brunk- mądrzela swój mô rozëm Wié nôlepi, co je trzeba Dbô, bë mało béł zajãti Żebë tóno sã nie sprzedac ... Tatk mù gôdô: - Je ju pózdno, Nie żdôj na òstatną chwilã! - Lepi pózno niżlë wcale!- Tak òdzéwô sã knôpéla ... - Zôs na ùrwisza cos robisz! To są czësté wësmi- chlëczczi! Bądz stateczny! Zacznij prãdzy! Nié jak wiater, na wstid lëdzczi ... - Sąsôd rzekł, że na pół z rzëcą Jes sã kòl nich wczora sprawił ... - Nie ba czasu! Muszôł nëkac. Kò móm jiné, wôżné sprawë ... - Co môsz zrobic dzys- zrób zarô! Nie òbzérôj sã, nie zmùdzë! - Za niewitro téż mdze dobrze ... Dwa dni wòlné- tej to pùdze ... Tak przecywiôł sã Brunk z òjcã Co ten słowò- òn dwa daje W kùńcu przëszło do ùmercô Trur dlô żubera nastaje ... Tatk mô w klónach wieczné snicé Syn na grób tam znitë stôwiô I mù nierôz łza welecy I co sztót do sebie gôdô ... - Prôwdã, prôwdã tej wë mielë, Czedëm rozëmë jesz skłôdôł Wiednom béł le swégò łepa A na doradë nie zwôżôł ... - Terô sómny jem na swiece Białczi ni ma, ni robòtë Za towarzëstwò mie bùdla I ne wëleniałé kòtë ... - Jakbë tak sã copnąc dało Czas miniony, wasze żëcé Achtnął bëm to, co straconé Z wami cesził sã dobëcym ... - Tak ba pewno namienioné, Cobëm jinym niósł òstrzegã Słëchôjta na waszich starszich, Bë ni mùszec pò tim chlëchac ... Tómk Fópka, Chwaszczëno, 15.12.2009 rokù, gòdz. 13.06 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 15.12.2009 15:18
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II Zupka Stark, co lëchą dzegwią miôł Colemało zupkã brôł Łëżkã nabrôł, w gãbã wlôł Sã do òcznych zãbów smiôł ... Dobrô zupka- bëlnô jôda Mòże kraftu w gnôtach dodac Bëlny zupë fùl tarina To nôlepszô witamina! Żurkù miskã, czej le wstôł Chłop so dobrze pòtemôł Wcygnął nudlów wiôldżi grôp Łikôł, jaż glingòtôł krop. Dobrô zupka ... Skùńczëc to sã mùsza rôz W talerzù sã nalôzł włos Strasznô wezbra w starkù złosc Òdtąd miôł ju zupków dosc ... Dobrô zupka ... Tómk Fópka, Chwaszczëno, 15 gòdnika 2009 rokù, gòdz. 12.11 ---------------- "Pòjmë w przódk z kaszëbizną!"- J. Trepczik- www.fopke.pl

fopke	wysłane dnia: 1.1.2010 13:19
Nie mogę oderwać się od tej strony! Zarejestrowany: 7.7.2003 z: Chwaszczëno Wiadomości: 462	Re: Wëlôc galã II Kùpletë cyrkòwégò zapòwiôdajka (materiał do rëchtowóny kabaretowi platczi pt. „We Dwa Kònie”) Cyrk je we wsë! Cyrk na miesce! Pòjta lëdze kąsk sã pòsmiôc! Akrobacë, psów treserzë Cëda! Jaż sã nie chce wierzëc! Leno pòd tim celtã ùzdrzisz Wszelejaczé swiata kùńsztë! Są pòskrómcowie panterów, Òbsmiéwajcë wcyg szpòrtëją... W klôtkach dzëwé są zwierzãta: Lew, je żółw i dwa kòcãta... To widzawisze mdze prima! Wlezta bënë! Czas zaczinac! Bãdze dzewùs baro łãdżé, Co figùrë znaje drãdżé... Tigris żiwcã pôłknie krowã! Złoti ùldżi na tescową... Wszëtkò super! Extra! Bómba! Biliet kùpta, póczi są jesz... Òceplenié bdze globalné! Òblecz kòżëch- tej nie zmiarzniesz... Zelintë zamienią w kôłpie... Przemówienié dómë môłpie... Nen pòkôzk wóm krew rozgrzeje: Chłop, co nożama żonglëje! Słoń na bali mdze tuńcowac... Jezdnicë na kòniach znowa... Hewò białka, co je chłopã!- Znô jã całô wnetk Europa! A za jinëch kratów lasã Młodi stolem- pierszô klasa! Henë chtos, chto znô kaszëbsczi! Pisac, czëtac- co sã wësni... Zdrzëta dzôtczi! Patrzta starszi! Tu, w ti bùdze- cyrk sã zacznie! Tómk Fópka, Chwaszczëno, 1.01.2010, gòdz. 13.01 ---------------- "Pòjmë w przódk z kaszëbizną!"- J. Trepczik- www.fopke.pl

| Od najnowszych

Poprzedni wątek | Następny wątek | Top

Wyróżnienia