Chcôłbëm sã z Wama pòdzelëc mòjima nônowszima dokôzama. Colemało piszã do nich zarô melodie- tak téż bierzta na to pòprôwkã...
Móm nôdzejã, że tej sej, tamsam to sã przëdô...

Tómk Fópka


Czëcé

Ptôszczi spiéwią, chrochce żaba
Zgrzébiã zarzi, szczeknie tósz
to nôtëra dôżnô sprawia,
że je czëjesz, że je znôsz
Ùszë tuwò są pòmògłé
w czëcym różnëch zwãków, mòwë
Czasã môłé, tej sej wikszé
Rôz jak żôdżiel- blëżi głowë

Czedë zdrokù ju nie sygô
Abò ùszë drzémią téż
Tedë, drëchù przënôlégô
ùżëc rãków. Jak? Kò wiész!
Rãką chãtno cos pòmaklôsz
Statczi, abò jinszą rzecz
Òbrôz farwny w głowie flot môsz
Sztôłt "òd rãczi" mòżesz miec

Czëcé czasã przińdze z cknieniô-
Tam sam wôżny zachtny nos
A w całoscë, czej na blace
cos sã pôli, żôli cos
To za sprawą prawie nosa
retac mòżesz swój dobëtk
Czedë w lëfce czëc ce dô sã
zôpôch ògnia- nëkôsz wnet.

Leno jedno òstnie czëcé,
chtërno samò rządzy sã
Òkróm jinëch, je wseczëcé-
z gòrzu jaż pò miłotã
Serce pierszé skrzëpczi graje-
Dôwô wskôzë lubny spiéwie
Na to czëcé kòżdi żdaje.
Czej sã kòchô- żëc tej lżi je!

Tómk Fópka

Kalisz, 18 stëcznika 2004 rokù

----------------
"Pòjmë w przódk z kaszëbizną!"- J. Trepczik- www.fopke.pl

Czôrnô balada

Je dzes w swiece takô strona,
W jaczi wszëtkò je na czôrno
Czôrné słuńce, czôrné blónë
Czôrny bãks i czôrné zôrno

Czôrné mëslë ò przëpôłnim
Z rena czôrno w kùchni, dómie
A pòd wieczór czôrné chlébczi
Kùpiac mùszisz w czôrnym krómie

Czôrné ùszë, czôrné nokce
Czôrné ruchna, czôrné bótë
Krëją w czôrnëch, môłëch chëczach
Czôrné dwiérze, czôrné rutë

W czôrnëch piéckach czôrny wãdżel
W całach rządzy czôrnô chëra
Czôrnô gòdzëna je wszãdze
Bùten, bëne- w czôrnëch wërach

Lëdzëska na czôrno robią
Tak jich czôrny kawel côrnął
Nôczôrniészô mësla takô:
Chto tak zrobił jich na czôrnô?


Tómk Fópka
Chwaszczëno, 24 stëcznika 2004 rokù, gòdz. 10.34

Wszëtkò pòmãk

Zejc na dakù, bòcón w chléwie
Mùcha w nosu òkã zéwie...
Wszëtkò pòmãk, pòmiészóné!
Gwës na rãbë wëkrãpóné!

Bùnczi w zupie, nudle w kawie
Chłop przë grôpkach, wieprz na ławie
Białka w trekrze liwczi wiãze
Z płëgã cygną kòtë rãdé

Bùwrón w słuńcu brunosc chwôtô
Zôs wãdzëbôk z òrzłã lôtô
Wòda pôli, òdżin znobi
Bezrobòtny kòżdi robi

Wszëtkò prôwda, piãkno wszãdze
Spòkój w rządze, mir w ùrzãdze
Leno rodzy sã pitanié-
Skąd to całé zamiészanié?!


Tómk Fópka
Chwaszczëno, 7 gromicznika 2004 rokù, gòdz. 21.11

Kabaret

Ref: Ò tim. co ce bòli, gniece- w kabarece
Co w szeroczim czëc je swiece- w kabarece
Wiców łupa tùwò żdże ce- w kabarece
Czas pòwôdżi maskã zdrzëcëc- w kabarece

Lëdzczé fele, słabé stronë
bądą wnet wënagòloné

Ref:

Pòliticzné wińdą sprawë
Kò ne téż są dosc cekawé

Ref:

Z chłopów białczi, z białków chłopi
Mdą czichrotac, szportë robic

Ref:

Na wëszczérczi pòj z kùlturką
Wlézë bëne smiéchù pórtką

Ref:


Tómk Fópka
Chwaszczëno, 7 gromicznika 2003 rokù, gòdz. 21.04

Méster żëcô

Wiedno nôlepszim blós chcã bëc!- wôżnô dlô mie to rzecz!
Dobëcô wińc na skarniach miec- nick wicy nie mùszi chcec!

Ref: Temù wcyg móm starã nową czënic miarã- wiedno wëżi jic!
Dlôte mòja zgrôwa: Czëp dërch brac òd nowa! Czestnic kòżdi dzéń!

Z môlã nôpierszim z szkòłë wéńc- starszim tim bùchã niesc.
Tej do robòtë bëlny, bë białce halac dëtków miech.

Ref:

Przë tim ò rodze nie zabëc- lëdzom nie robic przék.
Drëszno téż z drëdżim wespółżëc- miec ù jinszëch dlô se mir.

Ref:

Czedë przë kùńcu żëcô mdzesz, przëzdrzë sã smiało w tił.
Ùczëjesz głos, co rzeknie ce : Ten prôwdzëwie gòdno żił!

Ref:


Tómk Fópka

Chwaszczëno, 21 gromicznika 2004 rokù, gòdz. 11.40

Jakby tak jeszcze nuty... może być gif na priv, to sam dorzucę do postu

Staszk

Chãtno! Do nëch wszëtczich sztëczków móm ju kòmpùtrowò przërëchtowóné nótë z akordama. Tôczel w tim, że ni móm skanera. Nôlżi bëłobë je Cebie przëswac pòcztą.
Pòzdrówk

Tómk

Pórta

Za cemną, nieòdgadłą pórtą gòrô żëcé...
Czëc je zwón nôpiartégò serca...
A dësza nabiérô lëftu i chùchô...
Òczë stoją na starżi wseczëcowi krejamnotë...
Rãce smùkają jawernotã...
Cos tej sej sã tëmlëje, kùlduksô, szpókùje
I wstec dërchô w bezspikù...

Chto pòdô klucz zadżinionémù w mëslach...?
Chto mieszkô za cãżczima dwiérzama...?
Czë w całoscë...?
Czë...?

Zëmnyma słowama nawetka anioł
Nie mdze w sztãdze òdsztëkac zarostowónégò zómkù
Leno chto dzys dnia pòtkôł anioła...?
Zmerkôł jem blós dzélëk jegò ruchna...
Wicy nie dô sã lëdzczémù robôkowi òbjimnąc rozëmã...

Tómk Fópka

Kalisz, 28.03.2004

Òkrëszëna słuńca
(mòji córeczce, Anulce Damroczce)

Parmiń sôdł na kam i żëczno gò smùcze...
W rësënë zazérô, òkã dzyrzkòsc chwôli...
Pò òkrãglëznie sã pùrgô, w nórcëkù sã żôli...
Szukô w całi cwiardoscë słowa- klucza...

Tómk Fópka

Chwaszczëno,4.04.2004

Bardzo mi sie podobają twoje nowe utwory, (chociaż żaden nie jest "po belacku"). Pozdrowienia znad morza. Dominika