Zakłôdóm nen wątk, bò zastanôwiô mie... jaczé przeklëniãca ë wzdichniãca są w kaszëbiznie żëwé.
Znóm taczé wzdichniãca jak: "joczkù jo..." / "a joczkù, joczkù..." abò "a jenkù jo...", chtërne, jak mëszlã, nie mają wikszégò znaczenkù, blós jakno tipiczné wzdichniãca sã je ùżiwô.

W Trepczikù móm nôlazłi, że chłop chtëren przeklënô, to "klątewnik". Blós gòrzi z przëkłôdama. Jesz pôradzesąt lat temù mòżna bëło czasã ùczëc "A żebë ce Pùrt!" czë jinsze tegò ôrtu wërażenia. Równak jidze mie ò przëklëniãca (ë wzdichniãca), chtërne jesz dzysô mòżna ùczëc, ùczëc òd Kaszëbów. Gwësno wiele mdze wzątich z pòlsczégò abò anielsczégò... Ale jidze ò to, co je ùżiwôné. Mëszlã, że na taką temã nie mdze nót òpasowac ze słowizną ;)

W Wejrowie znóné je:
"Jak jô ce przepierdolã, tej ce nawet Pańsczi Janiół nie ùdwignie!" (chòc w formie "Janiół Pańsczi' a nie "Pańsczi Janiół") - gôdô tak stôrszi Kaszëba z Kòscérznë, chtëren mieszkô terô we Wejrowie.
wërażenia "wëpierdalaj stąd" ë "òdpierdol sã òde mie" - zarô widzec, że to wszëtkò są pòlaszëznë.

Mëszlã, że ju barżi kaszëbsczé są:
"z tobą to nie je..." abò "a jic të Bòsy Antkù", chtërne mògą miec formã przeklëniãca a téż wzdichniãca równoczasno.

Czedës mòżna bëło ùczëc "tuwò je jak pò Szwedach!" równak nie móm tegò nigdë w żëcym czëti. Ju rechli - "W twòji jizbie je jak w chlewie!" "Jistny chléw!" (òdpòwiednik pòl. "W twoim pokoju jest jak w burdelu!" (?)) . Przëbôcziwô mie sã téż "Z tobą to je krziż swiãti", chtërne na gwës nick ze swiãtoscą nie mô pòspólnégò ;)

Gôdczi: "Diable jeden jo!" , "Jasny szargón! (mòże Szargón?)" - to dwie, chtërne jesz mie sã przëbôcziłë, a mëszlã, że to są ju richtich kaszëbsczé przeklëniãca.


chto wié, mòże z tegò mdze jakô magisterkô abò co jinszégò ;) jô to równak zakłôdôm dlô rozwiniãcégò swòji słowiznë, bò doch jãzëka ùżiwô sã do wërażeniégò wszëtczich emòcejów - i dobrich, ë złich, a téż nie-je-wiedzec-jaczich (wzdichniãców). Tej jak znôta co òd se, chãtno pòznóm, a mòże mie sã jesz co przëbôczi ;)