„Kaszëbskòjãzëkòwô edukacjô” to bëła téma warkòwniów Kaszëbsczi Jednotë, chtërne ju trzecy rôz zrëchtowóné bëłë w Czôrnowsczim Młinie, tą razą òd 01.05. – 03.05. 2015 rokù.

Kaszëbskòjãzëkòwô edukacjô to czësto nie rëszony dzél naszi edukacje. Do terô nôbarżi pòstãpòwim dzejanim bëłë próbë dwajãzëkòwi pòlskò-kaszëbsczi edukacje na ôrt wespółdzejaniégò ë równoscë òbadwù jãzëków. Historëczno bëłë to:

1/ deklaracjô na Głodnicë w 1991 r. – òstateczno bez fòrmalny finalizacje;
2/ programa dlô dwajãzëkòwëch przedszkòłów "Kaszëbsczi cëdowny swiat" z 2011 r. z próbą pòpùlarizacje w 2014 ë 2015 r.;
3/ dwajãzëkòwé ùczbë chemie w KÒL w Brusach w 2014/2015 r.

W czas warkòwniów pòstawioné òstałë pëtania. Jakô je waju na nie òdpòwiesc?

1. Chcemë më miec kaszëbskòjãzëkòwą szkòłã?
2. Mô to bëc w całoscë kaszëbskòjãzëkòwô szkòła? (nót je przëszëkòwac czilenôsce, a móże nawetka przeszło dwadzesce programów dlô przedmiotów zgódno z jich programòwim spòdlim)
3. Mô to bëc dwajãzëkòwô szkòła? (minimùm 4 przedmiotë mùszą bëc ùcznoné na dwajãzëkòwi ôrt)
4. Òd jaczégò etapù edukacje nót bë bëło zacząc? (przedszkòlé, pòwszechnô szkòła, gimnazjum)
5. Mô to bëc tradicjowô szkòła? (strach ò pòwielenié felów pòlsczi szkòłë)
6. Mô to bëc szkòła òpiartô na nowòmódnym pòdeńdzenim do dzecka? (warô òglowòswiatowô diskùsjô ò wiôldżich zmianach we filozofie szkòłë)