W XIX sta. Cenôwa pisôł, że to Pùck je Stolëcą Kaszëb, a dzysô nie wiém czë lëdzë w Pùckù wcyg pamãtają ò tim, że są na Kaszëbach... Ë móm na to dosc wiele mòże nie nôlepszich, ale są, pòtwierdzeniów, z mòji bëtnoscë w Pùckù ë wanożenim pò tim gardze. Jedurnyma milëcznima akceńtama są Kaszëbsczé Fanë kòl sztrądë. (Nie liczącë MPZ chtërne mô bëc przemianowóny.)
W "Słowniku geograficznym Królestwa Polskiego i innych krajów słowiańskich" Wejrowò je pòdóné jakno stolëca kaszëbsczi zemi.
Zastanôwiô mie czë dzysô Wejrowò mògło bë miec taczi miono... Nibë stôwiają tam szlachòtë "kaszëbsczich nótów" równak ò felach wszëtcë wiedzą, a pòdejscé wëszëznów gardu do tegò je dosc letkawé... Wiele czasu kaszëbskô fana, chtërna je na rënkù, wisza 'do-górë-szpirama'. Nawetka pitowie na rënkù nie rozmieją pò naszimù gôdac...
Wszëtkò próbùje ùrëtac MPiMK-P ë Bibliotekô m. Majkòwsczégò, równak w parkù (téż jegò miona) ni ma niżódny jinformacëji ò Majkòwsczim. Wszëtkò dali ratëje Kalwarijô ë pielgrzimczi, ale tam to blós Kaszëbsczé Chùrë jidą z milëcznim akceńtã. Mùzycznô Szkòła nibë téż robi w czerënkù rozwòjô kaszëbskòscë ë z tegò, co pamiãtóm, nie bëło nigdë w ti szkòle jakòs antikaszëbskò... Z lat czej jem sã tam ùcził to bëłë to pierszé kroczi kù kaszëbiznie... Szkòła angażëje sã w robienié Festiwalów z Kaszëbską Mùzyką ë Spiéwama (Lëzëno, Szëmôłd) ë m.jin. końcertama w Zômkù.
Dali, gard mô miec "Pierszą" Kaszëbską Filharmònijã. Nie je wiedzec jesz na wiele mdze òna naczerowónô na kaszëbską stëgnã, ale wiedno mòżemë żdac ë òbôczic za jaczi rok, dwa..
W Wejrowie téż béł pierszi Kaszëbsczi Kongres. Tuwò dzejôł Méster Jón Trepczik ë tuwò téż leżi na cmãtarzu.
Wiele mòżna bë pisac ale czë Wejrowò je stolëcą... Wcyg nie wiém. Jeżle nie Gduńsk, tej dlô mie Wejrowò. Ale czë wëszëznë gardu tegò ni przejimą za letkò..

Cekawé je to, że pò kaszëbskù z wëszëznama móm gôdóni blós w Lãbòrgù!