Nie pòmòże na plestanié
Pòswiãconëch palmów pãk
Tu bédëjã wòdë lanié-
Mòkrô pludra tracy zwãk!

Mòkrô pludra? Czemù nié!
Le òb lato, òb czas żniw.
Bò sã tedë wòdã leje
Czedë slunkò fejno grzeje.

Blós jak pludra je pëskatô
Żebë nie miec czasë stratë
Tedë nót je w Jastra lac
Ni ma co za latã żdac!

Jastrowi jiwer

Cygnie Zajk bez barabónë
W kòszu bòbczi dzecóm niese
Lopk dëgówków dzwigô z sobą
Czë òn wszónom cosz przëniese?

Nie je wiedzec tegò gwësno
Bò òn czësto je òd se
Kicô zmachrowóny baro
Bò ZUS mù nie dôwô żëc

ZUS mù réńtë nie wëpłacëł
Chòc òn baro chòri je
Mógłbë zó nią kùpic auto
Ë dojéżdżac nim do gniôzd

A tak w gniôzdach mało bądze
Mòże leno jaja trzë
Chòc to téż dzys zônôleżi
Jaczi pòdatk nó nie bdze

Bò Skarbòwi mô na òkù
Wszëtczé kùrë co le ne
Niosą w Jastra farwné jaja
Òd nich haracz téż wzyc chce

Chcemë lepi nick nie gadac
Dëgówkama w slôdczi prac
Tim mądralą a ùnuzlą
Co chcą w Jastra „wòdã lac”!

Nôlepszégò na Jastrë sklôdają wszëtczi dobri lëdze z Nordë!!!

Wësmi- chlëczczi z jiny beczczi...

Czedës jem ùczuł, dze, nie j’dze spamiãtac-
Jaczi pòdatczi bëc mają na Swiãta:

- òd smùtny mùnië i krzëwégò pëska- chòc pò pół franka chcą òd nas zwëskac...
- òd naszi Mòwë, chòc móm téż tak czëté, że Nié-Kaszëbóm jesz wikszi sã wlepi...
- òd dëgòwaniô pò gòłëch szpérach, bądze pòdatk płacony w lirach...
- jak chtos òbgrizô pôlce- mdze płacył dolce...
- euro dlô tëch je zazychrowóné- co swiãcą jaja nie- gòtowóné...
- ruble są tima zôs namienioné, co mają ruską mafiã achtnioné...
- a ti, co za wiele wôżą- fùńtë do chcëwi kasë włożą...
- chto słëchô òb noc Radia Manila- dô na kòlektã miãsa dwa kila...
- a jesz Jastrowi Zajc- òd bòbka zapłacy dëtka...

Ò tim dëcht pierszégò łżekwiata,
Gòda mie białka, co mia sto trzë lata...