Zëma

Sniég zawalël drodżi wszelczé
Zôs drogòwcë zaskòczony
Le to wcale nie je dzywné
Nôród je do te znãcony

Nick nie wadzy, że przejachac
Autã nigdze to nie jidze
Bdą lëdzeska doma leżec
Bò pò swiãtach są jesz médëch

Leżą w miastach na szaséjach
Smiotë wiôldżé pò pazëchë
Dzecë bawią sã redosnie
Wkól je czëc mileczné smiéchë

Zëma pësznô kòl nas je
Le skąd wiedzą ò tim lëdze?*
Drodżi fëste są zawióné
Nicht tu do nas nie dojedze!

* jak bë sã chto ó to pitôl
są nad nama satelitë

Akcjô „Zëma”

Przëkrił smiotã zemsczé gònë
Nen Nôwëższi, Pón nad Pónë...
Zwònią w daczi mrozu zwònë...
Rutë w kwiatë malowóné...

A pòd sniegã drzémie zemia...
Chrapią drodżi w mòcnym spikù...
Chòjnë òbjimnął swim remniã
Wiater- zbiég, co wieczno szukô...

Ùsna rëklënë, spią plëtë...
Tósz cos mùmlô òbczas snicô...
Nawetk chłop, co szedł z robòtë
Spi, zamôrzô smôrkùl w swiéce...

Pùrgô sã pò błotkù miesąc-
Szrëce z parminiów tuńcëją...
Dzecëska sã z zëmë ceszą-
Mni jich starszi (...)Psëska wëją...

Za czim pisac taką wiérztã?
Zôs ò zëmie, mrozu, smiotach...
Mòże temù, żebë përznã
Rozëmk rozgrzôc- gwësno dlôte...

Tómk Fópka
Chwaszczëno, 20 lëstopadnika 2004 rokù, gòdz. 21.11

----------------
"Pòjmë w przódk z kaszëbizną!"- J. Trepczik- www.fopke.pl

Wilëjnô òpòwiesc

Le piérszô gwiôzdka wilëją zaswiécy
Ju Gwiôzdór przëchôdë do grzécznëch dzecy
Ju pitô z pacérza ë w héftë zazérô
A kòmù bë wlëmic spòd mùcë spòzérô.

Le Gwiôzdór wëslëchôl pacérza
Ju sã z palëcą na dzecë zamiérza
Ju trzôskô pò rzëcach jaż lecą skrë
A dzecë sã smieją, bò fejn jima je.

Le Gwiôzdór skùńczël wilëjné pranié
Ju sã zabiérô do darënków wrãczaniô
Ju chce do miecha pùtë wsadzëc swòjé
A cëż to sã dzeje: „Gdzeż pòdarczi mòjé!”

Le wëszedl Gwiôzdór placząc w noc bez miecha
Ju dzecë zãbë szczerzą – wiôlgô to ùcecha
Wilëjné pranié bdze jima zrëchòwóné w niebie
A wszëtczé darënczi mają blós dlô sebie

Në cëż, taczé glupé czasë, nót je le blekac
Że Gwiôzdór bez dzecë dôl sã òszëkac

Pùck, 24 gòdnika 2003 r.

Na ten Nowi Rok
Móm je żëczbów mòc:

Bë do przódkù chca sã jic
Ë bél kraft ò swòjé bic
Bë më zôs nie bëlë cemny
Welowalë kąsk rozëmni
Bë rządzący rozëm mielë
A sã glëpòt nie jimelë
Bë më jim dôwalë wiarë
A ti ò nas biôtkòwalë
Bë nie żdalë më za cëdã
Nie wzéralë wcyg do nieba
Le sã za robòtã bralë
A nié dërchã sztridowalë.

Dokôz ò genetice, czëlë: genë prôwdã Cë rzeką

Z wësoczich szkòlów
Na Kaszëbë sã zjachalë
Wiôlgòrozëmny ùczali
Co z ksąg jaczis wëczëtalë
Że Kaszëbi to nie knôpczi
Genë mają dozdrzeniale

Nôùkòwcowie jak môlpòwie
Pò lësënach sã drapalë
Sznëkrowalë pò Kaszëbach
Wszëtczich mët badérowalë
Òsoblëwie czôrnogãbnëch
Strzikawkama zakluwalë

Pò dzewiãcu wnetka latach
W kùńcu tak zwërokòwalë
Że ti z czôrnym pòbniebieniém
Nijak sã nie rëchòwalë
Do kaszëbsczich belnëch rodów
Bò so gãbë farwòwalë!!!

Przedzymk

Chòcô sniégù je pò kòstczi
Mòcny mróz nocką jesz gòszczi
Zybny wiater z nordë wieje
Jô Wóm rzekã: zymk ju dnieje!

Slunuszkò zza blón wëzérô
Kwiôtuszk z zemi lepk wëchilô
W lëfce czëc ju zymkù pôch
Jaż zatikô w plëcach dech

Kòtë jamer wëstwôrzają
Dzecë na Zajączka żdają
Mlodi smùlą sã do sebie
Klek klekòta czëc na niebie

Ju niedlugò to dô hëc
Że niejeden bądze chcec
Żebë zëma nazôd bëla
Kąséczk naju òchlodzëla!

----------------
zdrzë: www.zymk.net, www.belok.kaszubia.com

Kòt

Niejednô bialka je jak dzëwi, czôrny kòt
Ò tim wiedzec mùszi kòżdi mądri chlop
Nót je ją karmic, mùjkac, czëszczëc, smùkac
Codzéń przesnôżé slówka do ùszka ji dukac

Czasã mùszi pòczorchac kąséczk za fùterkò
Sygnąc pôlcã dosc glãbòk, bë spòtkac sã z ji nerką

Nôleżi ji dac wszëtkò, co le blós zapragnie
A òna rozkòchô, ùsôdzy calo ë… dëszã cë skradnie
Ë dzëwim zwëkã, namienionym czôrnémù kòtowi
Ùńdze swą stegną, tej czej nie bądzesz nó to gòtowi

Na kùńc jesz slówkò wërzeknąc mùszi w ti sprawie
Mòże sã wëdawac, że jak zwiornie jedna, je ju pò zabawie
Ë chòc tak przikri kawel mòże kòżdémù sã zdarzëc
Lepi wzyc so bialkã drëgą, chtos doch mùszi pôlnié warzëc!

----------------
zdrzë: www.zymk.net, www.belok.kaszubia.com

Spiéwka ò...

Stojã na binie
Rikóm w mikrofón
Lëdze słëchają
Nen refren spiéwają:

Ref.
Bò spiéwka mùszi ò czims bëc
Bò spiéwka mùszi mądrosc niesc
Bò spiéwka mùszi dawac wid
Bò spiéwka mùszi miec swój ritm
Bò spiéwka mùszi bëc jak lim
Bò spiéwka mùszi miec téż rim

Mikrofón skrzeczi
Barch corôz wikszi
Lëdze glëpieją
Ne słowa wtórëją:

Ref.
Bò spiéwka…

Z gãbë wërzëcóm
Słowa mądroscë
Knôpi barchnieją
Dzéwczãta mgleją:

Ref.
Bò spiéwka…

Na kùńc ti spiéwczi
Fanczi piskają
Lëdze klaskając
Sami spiéwają:

Ref.
Bò spiéwka…

----------------
zdrzë: www.zymk.net, www.belok.kaszubia.com

Czartowskô pòwiôstka dlô niebëlnëch dzecy

Je to pòwiôstka dlô niebëlnotów
Co lézą pierszi do wszëtczich psotów
Jak chcész cos zbrojic, dzeckò kòchóné
Przëczëtôj nôprzód co tu napisóné:

W pòdzemnëch czartowsczich strónach
Sedzą diôchlińcë na czôrnëch trónach
Ë zdrzą jak w kòtlach zlé dëszë sã mãczą
Pliwając w smòle glosno rikają a jãczą

Taczé téatróm diablińtą pasëje
Jeden a drëdżi ze szczescô sã smieje
Z wiôldżi redotë tëpama rëchają
Òstrima widłama pò slôdkach kluwają

Przeklãté dëszë w kòtlach barchnieją
Czej zli pùrtôcë pò chrzebtach jich leją
Glosno jamrëjąc retënkù wòlają
Òczama w niebò dërchã wzérają

Terô za pòzdze mòdlëtwë je slac
Nót bëlo w żëcym dobrim sã stac
Terô mùs w smòle rozmiec je pliwac
Do cemna ë hëcë sã przenãcywac

Z ti wiérztczi mòral wëchôdô taczi
Chto nie zrozmieje dëszã swą stracy
Ten co na swiece wiele rojbrëje
Niechôj sã lepi do piekla rëchtëje

----------------
zdrzë: www.zymk.net, www.belok.kaszubia.com

Jô a Jastrowi Zajk,
czëlë ò tim czemù swiãta kùńczą sã w Pòniedzôłk

Reno wstôl jem chùtkò wczas
Bùksë wlożël ë szedl w las
Tam dze wiôldżi dãbôcz stôl
Jem zrobioné gniôzdkò miôl

Ju dochôdôl jem do môla
Nigle cos skòknãlo z pòla!
Wzéróm – Zajk Jastrowi gnaje
Gwësno darënk nó miã żdaje!

Flot pònëkôl jem pòd dãba
Ë… sã zwrócël ë pôlkl zãba
Gãbą w mòjé gniôzdkò wpôdl
A z anielska rzekl: O shit!!!

Wzéróm bënë – cëż za wic?
Zajc mie nie òstawil nick!
Wkól leżalë czôrné kropczi
Fùj! To bëlë jegò bòbczi!

W glos diablëjąc wząl jô flintã
A zakùńczil jem ne swiãta!
Tej chùtuszkò dodom szedl
Dze ze szmakã Zajca zjôdl

Wszëtczégò bëlnégò na Jastra
Bògatégò Zajca ë festnégò dëgùsa!

----------------
zdrzë: www.zymk.net, www.belok.kaszubia.com