Przedzymk

Chòcô sniégù je pò kòstczi
Mòcny mróz nocką jesz gòszczi
Zybny wiater z nordë wieje
Jô Wóm rzekã: zymk ju dnieje!

Slunuszkò zza blón wëzérô
Kwiôtuszk z zemi lepk wëchilô
W lëfce czëc ju zymkù pôch
Jaż zatikô w plëcach dech

Kòtë jamer wëstwôrzają
Dzecë na Zajączka żdają
Mlodi smùlą sã do sebie
Klek klekòta czëc na niebie

Ju niedlugò to dô hëc
Że niejeden bądze chcec
Żebë zëma nazôd bëla
Kąséczk naju òchlodzëla!

----------------
zdrzë: www.zymk.net, www.belok.kaszubia.com

Dokôz ò genetice, czëlë: genë prôwdã Cë rzeką

Z wësoczich szkòlów
Na Kaszëbë sã zjachalë
Wiôlgòrozëmny ùczali
Co z ksąg jaczis wëczëtalë
Że Kaszëbi to nie knôpczi
Genë mają dozdrzeniale

Nôùkòwcowie jak môlpòwie
Pò lësënach sã drapalë
Sznëkrowalë pò Kaszëbach
Wszëtczich mët badérowalë
Òsoblëwie czôrnogãbnëch
Strzikawkama zakluwalë

Pò dzewiãcu wnetka latach
W kùńcu tak zwërokòwalë
Że ti z czôrnym pòbniebieniém
Nijak sã nie rëchòwalë
Do kaszëbsczich belnëch rodów
Bò so gãbë farwòwalë!!!

Na ten Nowi Rok
Móm je żëczbów mòc:

Bë do przódkù chca sã jic
Ë bél kraft ò swòjé bic
Bë më zôs nie bëlë cemny
Welowalë kąsk rozëmni
Bë rządzący rozëm mielë
A sã glëpòt nie jimelë
Bë më jim dôwalë wiarë
A ti ò nas biôtkòwalë
Bë nie żdalë më za cëdã
Nie wzéralë wcyg do nieba
Le sã za robòtã bralë
A nié dërchã sztridowalë.

Wilëjnô òpòwiesc

Le piérszô gwiôzdka wilëją zaswiécy
Ju Gwiôzdór przëchôdë do grzécznëch dzecy
Ju pitô z pacérza ë w héftë zazérô
A kòmù bë wlëmic spòd mùcë spòzérô.

Le Gwiôzdór wëslëchôl pacérza
Ju sã z palëcą na dzecë zamiérza
Ju trzôskô pò rzëcach jaż lecą skrë
A dzecë sã smieją, bò fejn jima je.

Le Gwiôzdór skùńczël wilëjné pranié
Ju sã zabiérô do darënków wrãczaniô
Ju chce do miecha pùtë wsadzëc swòjé
A cëż to sã dzeje: „Gdzeż pòdarczi mòjé!”

Le wëszedl Gwiôzdór placząc w noc bez miecha
Ju dzecë zãbë szczerzą – wiôlgô to ùcecha
Wilëjné pranié bdze jima zrëchòwóné w niebie
A wszëtczé darënczi mają blós dlô sebie

Në cëż, taczé glupé czasë, nót je le blekac
Że Gwiôzdór bez dzecë dôl sã òszëkac

Pùck, 24 gòdnika 2003 r.

Akcjô „Zëma”

Przëkrił smiotã zemsczé gònë
Nen Nôwëższi, Pón nad Pónë...
Zwònią w daczi mrozu zwònë...
Rutë w kwiatë malowóné...

A pòd sniegã drzémie zemia...
Chrapią drodżi w mòcnym spikù...
Chòjnë òbjimnął swim remniã
Wiater- zbiég, co wieczno szukô...

Ùsna rëklënë, spią plëtë...
Tósz cos mùmlô òbczas snicô...
Nawetk chłop, co szedł z robòtë
Spi, zamôrzô smôrkùl w swiéce...

Pùrgô sã pò błotkù miesąc-
Szrëce z parminiów tuńcëją...
Dzecëska sã z zëmë ceszą-
Mni jich starszi (...)Psëska wëją...

Za czim pisac taką wiérztã?
Zôs ò zëmie, mrozu, smiotach...
Mòże temù, żebë përznã
Rozëmk rozgrzôc- gwësno dlôte...

Tómk Fópka
Chwaszczëno, 20 lëstopadnika 2004 rokù, gòdz. 21.11

----------------
"Pòjmë w przódk z kaszëbizną!"- J. Trepczik- www.fopke.pl

Zëma

Sniég zawalël drodżi wszelczé
Zôs drogòwcë zaskòczony
Le to wcale nie je dzywné
Nôród je do te znãcony

Nick nie wadzy, że przejachac
Autã nigdze to nie jidze
Bdą lëdzeska doma leżec
Bò pò swiãtach są jesz médëch

Leżą w miastach na szaséjach
Smiotë wiôldżé pò pazëchë
Dzecë bawią sã redosnie
Wkól je czëc mileczné smiéchë

Zëma pësznô kòl nas je
Le skąd wiedzą ò tim lëdze?*
Drodżi fëste są zawióné
Nicht tu do nas nie dojedze!

* jak bë sã chto ó to pitôl
są nad nama satelitë

Lëtanijka do kaszëbsczégò jãzëka

Czej „ùczałi” jaczis wgadac cos sã starô- biôj mie précz niekaro, z twòją pòlską gwarą!
Czej kùreszce czëc, że na to ju nie zgarôsz- biôj mie précz niekaro, z twòją pòlską gwarą!
Czedë dwùch ùczałëch ò tim pleszcze narôz- biôj mie précz niekaro, z twòją pòlską gwarą!
Czej ò tim gôdanié kąsk za długò warô- biôj mie précz niekaro, z twòją pòlską gwarą!
Czej ju trzech ùczałëch przekònónëch baro- biôj mie précz niekaro, z twòją pòlską gwarą!
Czedë argùmeńtë mést sã skùńczą zarô- biôj mie précz niekaro, z twòją pòlską gwarą!
Tima, co w Warszawie lëchò nóm sã sprawią- biôj mie précz niekaro, z twòją pòlską gwarą!
Czej ju mëslisz, że z tim przespac bë sã dało- biôj mie précz niekaro, z twòją pòlską gwarą!
Zafeflotôł Remùs nad ksążk fùlną karą- biôj mie précz niekaro, z twòją pòlską gwarą!
Czej ju gôdką żódną nie przekònôsz miarą- biôj mie précz niekaro, z twòją pòlską gwarą!
Czedë dzywnô wiérzta, rim nie ten, tej dało- biôj mie précz niekaro, z twòją pòlską gwarą!

Tómk Fópka
Chwaszczëno, 10 lëstopadnika 2004 rokù, gòdz. 22.12

----------------
"Pòjmë w przódk z kaszëbizną!"- J. Trepczik- www.fopke.pl

Wiérzt ò sztridze,
a téż ò tim co Kaszëb mô w gãbie
ë jak dalek mòże z tim czims dóńdz

Òd latów latecznëch
Lëdze sã
Sztridëją
Czë kaszëbskô gôdka
Jãzëk to
Czë gwara

Niejedny niekara
Cë rzecze:
“To je pòlskô gwara!”

A jô wóm rzeknã prosto
Jãzëk to jak trzeba
Z chtërnym dóńdzesz
Wszãdze
Nawetka do nieba

prof. Janowi Miodkowi

Wanożnô wëliczónka

Lażą lëdze pò Kaszëbach, tuwò wiele jidze zwiedzac:

W Gduńskù Krësztofa, w Pùckù hôwingã,
W Wejrowie Kalwarëją, w Kartuzach mùzéùm,
We Wdzëdzach stôré chëcze, w Jastarni mòrsczé secë,
Na Zabòrach pëszné pòla, w Szwajcarëji zôs jezora,
Diable kamë tam-sam leżą, w Mechòwie do grotë bierzą,
W Łebie wiôldżé stoją dunë, kòl Darżlëbia lasë znóné...

Czasë nót je do te wiele - tu nie sygną trzë niedzele,
Trzéba chòdzëc całi rok, bë widokã napasc zdrok.

Krócechny, filozoficzno-filologiczno-telekòmùnikacëjno-geògraficzny wiérzt ò kùńczeniém, proszeniém, zwònieniém, jachaniém ë òdpòczëwaniém w daleczich stronach.

Czas ju na łikend
Tidzenia de edn
Proszã nie zwònic
Bò jadã do Kent!