Aria pitë

Wstec mie wadzy mòja białka ò tã półlitrową...
Cëż móm robic, bë òprzesta wcyg mie sëszëc głowã?

Ref: Nie chcã piwã! Jô niechc sznapsu! Winkò je za młodé!
Dëcht arbatczi bëm sã napił... Nëże! Halôj wòdë!

Przë robòce, co sztót kómpel kòrnusa w lëft dwigô,
Barżi mù na nick-robienim tedë zanôlégô...

Ref:

Na pasterce slôdë stojã, białcëskò mie rzëpi,
Kòl mie chłop, co przë wieczerzi sledza dobrze pòpił...

Ref:

Znôw, czej jadã dodóm baną, czasã jaż zatikô...
Smôrkòle wëpité mają- òkno chtos òtmikô...

Ref:

Jak tu strzëmac w taczi stronie, dze nawkół sã leje..
Skòczë drëchù za pół litrã! Chłop chce czëc, że żëje!

Ref:

A na drëdżi dzéń łep bòli. Przë mie mòja Zosza...
A nie gôda jô ce stôri! Białkò, leno proszã...

Ref:

Tómk Fópka, Chwaszczëno, 25 lëpińca 2004r., gòdz. 10.51

Na pół z rzëcą

Òd zéńdzeniô do zéńdzeniô
Czas nóm lecy chùtkò
Czej òb zëmã mróz sã sklëni...
W noc czerwińca krótką...

Wiedno jedną môsz òdpòwiesc:
Nié! I na tim kùńc je!
Nick, że ùszë móm òdmiarzłé...
Twój na głowie wiónk schnie...

Lubną skarnią sëwé włosë
Tam sam przëkriwają...
A jô przë ce czësto łësy
Zestarzôł sã , żdając...

Że mie w kùńcu "jo" òdrzekniesz
Dëszã cwiardą zmikczisz
Të le swòjim "nié" wcyg przék mie
Kòżdą gôdkã kùńczisz!

Do zgłëpieniô z tim kùńczenim
Gôdczi, z tobą bëcô!
Cos mie bierze wcąg na smienié-
Wiérzta na pół z rzëcą!

Tómk Fópka, Chwaszczëno, 13 lëpińca 2004r., gòdz. 21.21

Wëcmanim...

Dëcht za wiele sóm nie zdzejô człowiek
Chòcbë miôł abò sto ùdbów w głowie
A mòcë tëli, co pôrã lëdzy
Żëcé mù chùtkò chãcë wëstëdzy!

Leno wëcmanim przë wszednim dzejanim:
W balã granim, dobiwanim,
W łóżkù spanim, ùmiéranim,
Wiadła żdanim, wëchòwanim,
W szkòle karë z wiédzą pchanim!

Czej sã wdrapiész na niebné wiżawë
Z górë przëzdrzisz sã na lëdzczé sprawë
Taką doradã sélac mdzesz znowa
Dlô swòjëch drëchów w jich zemsczich zgrôwach:

Leno wëcmanim przë wszednim dzejanim:
W balã granim, dobiwanim,
W łóżkù spanim, ùmiéranim,
Wiadła żdanim, wëchòwanim,
W szkòle karë z wiédzą pchanim!

Tómk Fópka, Chwaszczëno, 11 lëpińca 2004r., gòdz. 10.25

Frantówka stôrégò kawalera
(do mùzyczi Wacława Kirkòwsczégò-z nowégò, rëchtowónégò prawie spiéwnika)

Jak të mie sã widzysz! Jaż co robic nie wiém!
Nogama przebiéróm, niglë cos ce pòwiém.

Bëne dëszë gòrô rozszôlałi òdżin-
Të leno pòzérôsz, co sã dzeje nie wiész.

Jakùż pëszno wëzdrzisz, strójnô w parmiń słuńca!
Òczama pòłikac mógłbëm ce bez kùńca!

Bëne dëszë...

Wszëtczé twòje stegnë ju na pamiãc znajã.
Zdrokã òdprowôdzóm, wiérno na ce żdajã.

Bëne dëszë..

Tak przez lat szterdzescë ni móm biédny szczescô.
Wiedno jiną drogã bierzesz na wanogã.

Pewno dóm so pòkù z taką gòńbą drãgą!
Kò jô téż chcã pòżëc! Cziwnã na to rãką!

Tómk Fópka, Chwaszczëno, 7. lëpińca 2004r., gòdz. 21.52

Felô lëftu
(pòd hip- hop)

Felô, felô lëftu...

Dëszny swiat, zgnity swiat- wieczné pracharzenié
Przed se zdrzã, chwôtô miã żëcô zazgnilenié
Lëchi swiat, fùl złëch farw, trójno wkół rozbleków
Dôka, noc, z blónów mùr, pórta z lëdzczich nëków

Felô, felô lëftu...

Wcyg le "Nié!", wiedno dim- DOBRI zaczadzony
Dzes tam spi czôrny ZŁI- żdaje zatacony
Cëż jô sóm, biédny knôp, zdzejac mògã procem,
Czedë zôs céniô słów òczë krëje nocë

Felô, felô lëftu...

Jesz tej sej, dzecny smiéch wid w kòmùdã wnôszô
Mëma, tatk- słowa dwa, miły cãżôr noszą
Snôżi wiek młodëch lat rzucô parmiń cepła
Czej sã dzys òblôkł swiat w szarą zybù sëkniã...

Felô, felô lëftu...

Tómk Fópka, Chwaszczëno, 4 lëpińca 2004r., gòdz. 8.44

Trzë krze na rzmie
(pòd hip- hop)

Leno trzë krze na rzmie znają prôwdã- jak je.

Sôdł wãdrowczik na rzmie i òbzérô so nodżi
Zmarachòwóny je, gwësno przeszedł sztëk drodżi
Skądka dżął? Chto to wié...Nie znô nicht, dze òn jidze.
Hewò spi. Mòcny spik- sprawiedlëwi drëch w biédze

Leno trzë krze na...

Tądka żga róta dzëków, gnónô wilczim głosã
Całé karno je dalek- òstało w trôwie prosã...
I kwiczi, i teskni, i sã wierzgòli
Samò, jak pôlc żôli sã, skòli...

Leno trzë krze na...

Ùrzasłé tim szlachã szło dzéwczã młodé
Przez rojbrów nielusëch napadłé,
Co wiónk ji chcelë zdrzëcëc z głowë
Ji dzéwczëcy swiéżoscë spragłi...

Leno trzë krze na...

Garnął téż stôri Roch, chtëren cãżczi miôł chód
Wëpic rozmiôł za trzech- zrobic leno za dwùch
W mrówków legnął sã kòpc, reno czësti béł gnôt...
Sznapsu w se Roch miôł dosc- sóm zagrichą sã stôł...

Leno trzë krze na...

Sôrna dogònił szos zapòzdzony jachtë
Wspiął sã dzyrzkò jesz rôz, pózni chwëca gò krãpë
Stanął wnetk kòle krza. Czuł, że żëcé ùcékô...
Wtim chtos strzélnął znôu. Niepòtrzébno! Òn zdichô...

Leno trzë krze na...

Dzôtków karna wanoga prawie tã wëbra drogã
Jidze, redotã niese, spiéw i młodoscë wiéw
Tam sam wietew òberwie, czasã kwiôtka przëdeptnie...
Papiórk szmërgnie, tam béksã- wcyg smiéch!

Leno trzë krze na...

Sôdł wãdrowczik na rzmie i òbzérô so nodżi
Zmarachòwóny je, gwësno przeszedł sztëk drodżi
Skądka dżął? Chto to wié...Nie znô nicht, dze òn jidze.
Hewò spi. Mòcny spik- sprawiedlëwi drëch w biédze

Leno trzë krze na...

Tomôsz Fópka, Chwaszczëno, 30 czerwińca 2004r.

Pamiãtnik
(do mùzyczi Jerzégò Stachùrsczégò)

Czej môsz latków pôrã i cekawi ce
jak to czedës bëło- Nëże! Zazdrzë le!

Tam, w szëflôdze drzémią dëszczi,
Stôrëch dzejów smaczczi...
Leno sygnąc sygnie rãczką--
Rozrzeszëc ne paczczi...
Ju na pòmòc jidze starka,
Tatk czerëje kroczi
A òtemkło stôrô ksążka
Ce do bëna rôczi...

Padô deszcz za rutą i zazérô smrok
A të so òdjimczi pòòbzérôsz rôd...

Cëż to je za snôżô brutka
W taczich smiésznëch ruchnach!?
Ten chłop wëzdrzi jak nasz Tóna!
Òd przëjãcô krutka...
Naskriblóné białczi rãką:
"Òstanita z Bògã!"-
To napisa sostra Wanda,
Czej za greńcã rëgnã...

Czë ce w żëcym dobrze, czë ce prawie zle-
Wiedno wôrt przëbôczëc stôri, piãkny wiek!

Zazdrzë czasã w nen pamiãtnik,
Zgëldzë żôłté kôrtczi...
Pòczuj zôpôch dôwnëch czasów,
Łzą niech përznã skropi...
Pòznôj córkã cotczi Klarë,
Wùje Gùsta wąsë
Òbôczë, chto je tim zmiartim,
W nórce sadłim bojsą...

Czë ce w żëcym dobrze, czë ce prawie zle-
Wiedno wôrt przëbôczëc stôri, piãkny wiek!

Tómk Fópka
Chwaszczëno, 7. czerwińca 2004 rokù

----------------
"Pòjmë w przódk z kaszëbizną!"- J. Trepczik- www.fopke.pl

Tatowi...

Sprawiedlëwi cãżôr rãczi,
Co jesc dodóm przënôsza, w taszi chléb z tomatą,
Worztë, tutã bómków a czasã téż gazétã...
W chëczi Mëma żdaje, z Nią dzôtków grónkò na to,
Żebë Òjca òbôczëc, razã noc przëwitac...

Sprawiedlëwi cãżôr rãczi,
Chtërna dozéra chòwã, do rézë szëkòwa,
Zemiã tak płëgã smùka, jãdrzny brzôd z ni zbiéra...
Kôzała jã ùwôżac, jak sã òd ni nie dac,
Pòtrafia drogã wskôzac- czej przeszło wëbiérac...

Sprawiedlëwi cãżôr rãczi,
Co ùcza drëdżich achtnąc, kaszëbską stanicã,
I z Bògã krótkò trzëmac i wiedzec, co sã chce...
A zasłużił so rôz chto- tej prosto wënica...
Dzys le sã to pamiãtô: Jak dobrze, czej Tatk je...

Tómk Fópka

Chwaszczëno, 11. łżekwiata 2004

Bardzo mi sie podobają twoje nowe utwory, (chociaż żaden nie jest "po belacku"). Pozdrowienia znad morza. Dominika

Òkrëszëna słuńca
(mòji córeczce, Anulce Damroczce)

Parmiń sôdł na kam i żëczno gò smùcze...
W rësënë zazérô, òkã dzyrzkòsc chwôli...
Pò òkrãglëznie sã pùrgô, w nórcëkù sã żôli...
Szukô w całi cwiardoscë słowa- klucza...

Tómk Fópka

Chwaszczëno,4.04.2004