Szpëtel w Kartëzach nie mdze likwidowóny, bo prawie podpisôł kontrakt z Nôrodnym Funduszę Zdrowiégo. Równak nen rok nie mdze wiele lepszi, czego swiądę mają dochtorowie, bo i w całi służbie zdrowiégo nie je bëlno. Rok 2003. dlô szpëtla nie béł nôlechszi, bo w séwniku ostôł otemkłi Szpëtlowi Retënkowi Oddzél. Ob 4 miesące dzejaniégo ostało tam przëjęté 7 tës. osób - a to strzédno kol 60 na dzéń! Codzéń we szpëtlu robi 4 dochtorów ë 20 sostrów, a na retënkowim oddzelu są 4 karetczi, jaczé muszą sygnąc na całi kréz. Brëkuje jesz komputrów a téż direchcëjô szpëtla mô nôdzeję na jesz jednę karetkę.

Czôrnô Woda popłënie jak czedës! - tak mô wczorô rozsądzoné Zôrząd Wdzydzczégo Krajobrazowégo Parku. - W pięcdzesętich latach bëła móda na "prostowanié" rzéków - gôdô Andrzej Penk, direchtór Parku. Tego skutkę gburzë mielë jiwer, wiele łąków zmieniło sę w błotka, a téż zmiészëło sę wëstępowanié trocë jezorny. Ostałë ju zrobioné geodezyjné pomiarë ë podpisóny ugôdënk z Ekofunduszę. W gromiczniku zacznie sę czëszczenié dôwnégo korëta, a ju we strëmianniku rzéka popłënie jak czedës.

ë wiele wicy! Wiedno kaszëbsczé wiadło
"Klëka" codzéń reno o 5:45 w Radio Gduńsk (103.7 MHz)