Kùreszce w Centrum Kùlturë Kaszëbsczi w Strzelnicë w Kòscérznie zawitôł Remùs ze swòjima przigòdama. Stało sã tak z inicjatiwë bùrméstra gardu Zdzisława Czuchë, chtëren w gromadze z Centrum Kùlturë i Spòrtu i direktorã Jónã Dittrichã ùdbëlë przërichtowac cykl zjindzeniów, na chtërnëch czëtónô bãdze nôpiãkniészô kaszëbskô pòwiesca drodżi. Na pierszim zjindzenim przëczëtóny òstôł pierszi rozdzél. Pò pòlskù czëtôł jeden z nôwiãkszich pòlsczich pòétów dzysôdniowich, Adam Ziemianin, zôs pò kaszëbskù czëtôł Paweł Ruszkòwsczi, z I LO w Kòscérznie.

Wëdarzenié schôdô sã w czasù z dzejanim tikającym sã richtowaniô sã Ùrzãdu Gardu Kòscérznë do pòstawieniô sztaturë Remùsa na kòscérsczim rënkù. Bùrméster Czucha wësłowił baro wiôlgą nôdzejã, że w nadchôdającëch latach Kòscérzna przëbôczi całim Kaszëbóm, że to na ti zemie sã Majkòwsczi rodzył, pisôł i tuwò téż miôł wanożëc ze swòją karą Remùs.
Tomasz Cyprian