Ti, chtërny widzelë przedòstatné TJNZ News w TTM (z 26.01.2012), wiedzą, ò co jidze, tëch, jaczi nie wiedzą, rôczã do òbezdrzeniô, chùtkò zrozmieją, dlôcze terô, 9 gromicznika 2012 rokù, Kazy Durszlôk òbmëslôł taką Pòmstã...
Ùczbë kaszëbsczégò, jaczé szëkùją dlô naji młodi lëdze w TTM, są wcyg lepszé a czekawszé. To są taczé môłé filmòwé etiudë, w jaczich je baro sã mie widzący ôrt szpòrtowaniô: fùl je w nich absurdu i czôrnégò hùmòru, je téż nawlekaniô do terôczasnëch sprôw, do te, ò czim sã gôdô w mediach. Wiôldżé brawa dlô ùdbòdôwców, realizatorów i aktorów!


Pò TJNZ News w òstatnym programie To je nasza zemia je jesz kôrbiónka z jedińcznym karnã, chtërne òd 3 lat prezentëje kaszëbsczé disco polo, z karnã Bliza z Nordë.
Ò swòjich ùdbach gôdają Sławek Hincke (załóżca Blizë i autór 30 kaszëbsczich frantówków z jich repertuaru), Dariusz Renusz a Piotr Cëskòwsczi.