Sprawòzdanié Przédnika Klubù Zrzeszenia Kaszëbskò-Pòmòrzczégò w Baninie za czas 5.04.2003 - 19.03.2004

Nasz Klub òstôł założony 24.02.2002 rokù. Tej më na przédnika wëbrelë Drëcha Albina Bichòwsczégò. W czasu jegò przédnikòwaniô ùdało sã zrealizowac wiele baro wôżnëch inicjatiwów, jak chòcbë historiczné ju dzys wëdarzenié związóné z pòswiãcenim òbrazu Słëdżi Bòżégò Bpa Kònstantina Dominika. W tim czasu wiele bëło robioné w sprawie ùczbë kaszëbsczégò w szkòłach, bëłë zéńdzenia z pisarzama kaszëbsczima, a przede wszëtczim rëchtowanié mszów i jinszich ùroczëznów kòscelnëch z kaszëbską liturgią, co je dali bëlno prowadzoné z wiôldżim ùdzélã Drëcha Albina.

Jednym słowã, czej jô òstôł przédnikã 5 łżëkwiata łońsczégò rokù, jô zapòwiôdôł kòntinuacjã tëch dzejaniów i w taczim téż dëchù przëszedł nen całi rok.

To łońsczé zéńdzenié wëbòrczé bëło téż pòd znakã rozpòczãcé cyklu ùroczëznów, chtërne zakùńczą sã w czerwińcu tegò rokù nadanim miona Jana Trepczika szkòle w Miszewie. No miono zainspirowóné przez nasz Klub òd razu òstało baro dobrze przëjãté przez spòlëznã Miszewa i dalek pòza nią. Z tim wiąże sã téż rozpòczãcé ùczbë kaszëbsczégò jãzëka w Miszewie. Dzecë, co chòdzą na te zajãca, przërëchtowałë przedstôwk, chtëren béł wëstôwióny na nastãpny ùroczëznie w Miszewie 21 rujana, na chtërnã przëjacha téż familia Jana Trepczika. Na ni przekôzóné bëło 12 ùczbòwników do nôùczi kaszëbsczégò, na jaczé dëtczi z inicjatiwë Klubù ùdało sã zebrac westrzód naszich nôleżników. 15 ùczbòwników darowónëch przez Klub trafiło téż do szkòłë w Baninie. To zaspòkòjiwało wtenczasné pòtrzebë òbù szkòłów. Pòtrzébnô je terô drëgô czãsc ùczbòwnika, jakô ùkôże sã za czile dni, a przë jaczi wëdanim téż nôleżnicë Klubù mają swój wkłôd. Òstatnô ùroczëzna pòswiãconô przińdnémù patronowi w Miszewie bëła 10 gromicznika tegò rokù. Béł to pòwiatowi Kònkùrs wiédzë ò Trepczikù współòrganizowóny przez Klub. Midzë jinszima na nim òtemkłô bëła drëgô w gminie Żukòwò szkòła wësziwkù, jaką prowadzy nasza nôleżniczka Alina Lech-Wierzińskô. Z szkòłowim dzejanim związóné są téż wanodżi dzecy, co ùczą sã kaszëbsczégò. Pierszô bëła do Chmielna. Autokarã jachałë dzôtczi i z Banina i z Miszewa. Wanoga ta dostarczëła wiele miłëch wrażeniów, ale téż i wiédzë ò naszim regionie. Przë leżnoscë dzecë pòznôwają czekawëch lëdzy z ti zemi, chtërne są dobrim przikładã i ùczbë i dzejaniô dlô tatczëznë. Wanodżi bëłë téż rëchtowóné do Telewizji Gduńsk (dzecë z Banina) i do Żukòwa, dze dzecë z Miszewa pòznałë zespół pòklôsztorny i robòtã w Urzãdze Miasta.

Bez wątpieniô nôwôżniészim wëdarzenim w tim minionym rokù bëła pielgrzimka do saktuarium Matczi Bòsczi Królewi Kaszëb w Swiónowie. Ògromny rozmach òrganizacyjny, wiôldżi zaangażowanié baro wiele nôleżników nié blós naszégò Klubù. Pielgrzimka òdbëła sã 19 i 20 lëpińca i bëła wiôldżim naszim dokònanim, chtërno dalek òbiło sã w prasë lokalny i regionalny, radiu i telewizji. Më zanioslë na remionach òbrôz Bpa Dominika. Chùtkô beatifikacja Słëdżi Bòżégò bëła główną intencją tegò òdpùstu, tak że bez niżódny przesadë mòżna rzecz, że Banino z òbrazã Biskùpa bëło w dëchòwim centrum negò pòrãnôscetësãcznégò zgromadzeniô Kaszëbów. Do współòrganizowaniô i wspólnégò jidzeniô ùdało sã téż zachãcëc pielgrzimów z parafii Lezno, Zukòwò, Chwaszczëno, Czeczewò i Pòmieczëno. Razã przëszło nas do Swiónowa 168 òsób. Pielgrzimka dostarcza baro wiele dëchòwëch przëżëców, a téż wiôldżé doswiôdczenié, chtërno gwës spróbùjemë latos spòżitkòwac, czej znôwù pùdzemë 17 i 18 lëpińca.

Na zéńdzenim, jaczé pòdsëmòwało pielgrzimkã 27 lëpińca, òdbëła sã nastãpnô wôżnô nasza ùroczëzna, to je nadanié naszémù parafialnémù chùrowi miona "Chòranka". Chùr dzejô ju sztërë lata. Wiedno je na kaszëbsczich mszach i jinszich zéńdzeniach. Dzãka wespółprôcë naszégò Klubù z sąsednyma partama i klubama, chùr wëstąpiwôł ju w Sopòce dwa razë, w Gduńskù Morenie, Żukòwie i Swiónowie. To téż pòkôzywô, jak òtemkłé je nasze dzejanié na jinszé partë. Przez to inspirëje téż do pòspólny robòtë dlô dobra tatczëznë.

Tak téż prawie bëło 28 séwnika, czej w Baninie gòscył Teater Amatorsczi z Lëzëna ze sztëką "Dzéwczã i miedza". To wëdarzenié scygnãło gòscy z rozmajitëch strón i można rzec, że w dzélu wskrzeszëło kąsk przëgasłé wiôldżé tradicje teatralné na Kaszëbach. Përznã pózni nen teater wëstąpił w Zukòwie, a prawie przed pôrãnôsce dniama nagriwôł w radiu. Wnet sztëka ta ùkôże sã na płice kómpaktowi. Wierã téż to zachãcëło naszich młodëch nôleżńików do przërëchtowaniô widzawiszcza "Wrëjowanié w cemno". Tak téż przë salwach smiéchù "wrëjowóné" bëło dwa razë w Baninie na Zéńdzenim Òpłatkòwim Klubù i na Dniu Starków, w Pãpòwie téż na Dniu Starków, Miszewie òbczas Balu Karnawałowégò i w Żukòwie na ùroczëznie założeniô Karna Młodzëznë Kaszëbsczi "Cassubia", co nawiązywô do przedwòjnowi òrganizacji założony przez wiôldżégò ti zemi Karola Kreffta na Uniwersytece Warszawsczim. Zéńdzenié òdbëło sã 6 gòdnika. Bëło na nim 39 młodëch Kaszëbów z rozmajitëch strón. Drżéń liczebny i òrganizacyjny stanowią naszi nôleżnicë, a je - jak wszëtcë dobrze wiedzą - dosc tëli młodëch w naszim parce, co napełniwô nôdzeją na bëlné dzejanié przez dzesątczi lat. Przédnikã "Cassubii" je nôleżnik zarządu naszégò partu Magdalena Bisewskô.

Pòdobny téż charakter miôł snôżi kòncert w Miszewie związóny z 30-lecym dzejaniégò znónégò kòmpòzytora, dërch młodégò dëchã, Jerzégò Stachùrsczégò. Wëstąpiłë na nim "Dzecë Swiãtégò Wawrzińca" z Lëzëna i "Dzôtczi Rodny Zemi", a na zalë bëło bliskò 150 òsób, w tim delegacje z rozmajitëch sąsednëch partów Zrzeszenia i wiele dzecy miszewsczi szkòłë. Kòncert òdbéł sã 25 rujana, dwie niedzele przed òficjalnym założenim "Cassubii".

Razã z "Cassubią", chtërna dzejô fòrmalnie przë naszim parce, bëłë téż robioné miłé rozegracje ò charakterze zabawòwò -integracyjnym. Tak tej më mielë mòżnosc bëlno sã zabawic na Andrzejkach w miszewsczi remize, czë téż tam na Balu Karnawałowim 14 gromicznika. Gwësno kòżdi z ùczãstników długò zapamiãtô wspaniałi kùling, chtëren më zrëchtowelë w òkòlim Czeczewa. Ti, co nie bëlë, mòglë sã zadowòlëc chòcle relacjama w Panoramie, Teleexpressu czë Kurierze, a téż w Rodny Zemi, z jaczi wiele lëdzy dowiadiwô sã ò naszim dzejanim.

Mòżna rzec, że pòdsëmòwanim tegò czasu, téż szerok relacjonowónym w mediach, bëła ùroczëstô Droga Krziżewô w Swiónowie 5 strëmiannika, na jaką jachôł òd nas autokar razã z chùrã "Chòranka". Bëtnosc naszégò partu bëła tam baro mòcno zaakcentowónô.

Te wszëtczé inicjatiwë sprôwiają, że do naszégò karna przëchôdają wcyg nowi nôleżnicë. W cągù rokù liczba wzrosła dwa razë. Na dzys dzéń je nas 72 nôleżników. Wszëtkò wskazywô na to, że liczba ta bądze wzrôsta. Przë taczim dzejanim ni móm wątpieniô, że jesz latos wierã bądzemë mòglë zrobic dodatkòwą ùroczëznã związóną z przëjãcym setnégò nôleżnika partu.

A wszëtkò to je zasługa wiele aktiwnëch òsób, jaczé są midzë nama. Na pierszi plan jednak trzeba wskazac na nôleżników zarządu, chtërnym bëło mie dóné czerowac. Są to wiceprzédnicë Kristina Dalekô i Witek Szmëdtka, sekretéra Magda Bisewskô, skarbnik Jurek Kómkòwsczi i nôleżnik zarządu Renata Pùpacz. Wama òsoblëwie dzãkùjã, tak jak téż wszëtczim zebrónym dzys na ti zalë za rok bëlny robòtë.

Bóg zapłac baro.

Eugeniusz Pryczkowski