Òd 4. maja, w Warszawie przez dwie niedzele je nagriwónô kaszëbskô jãzëkòwô wersëjô (dabing), amerikeńsczégò filmù pt. „Jezës”, pg Ewanielëji Sw. Łukasza. Pôrãdzesąt pòstacëjów zwëskiwô kaszëbsczé głosë. Kòòrdinatórą i reżisérą nagraniô je Zbigniew Jankòwsczi- dôwca głosu Jezësa. Pòstrzód kaszëbsczich òdtwórców pòtikómë m.jin. Danutã Stenkã, Wandã Czedrowską, Elã, Genka i Werónkã Prëczkòwsczich, Mariusza Szmidkã , Leszka Szmidtke, Maceja Miecznikòwsczégò (Leszcze), Jarka Kroplewsczégò i Tómka Fópkã.
Nagranié rëchtuje MASTER FILM LTD (chtërno robi pòlsczé wersje m.jin. do filmów Disney’a), na zlécenié Rësznotë Nowégò Żëcô. Przëstôł na to abp Tadeùsz Gòcłowsczi a zacwierdzëło kaszëbską wersëją karno: ks. dr Jan Perszón, prof. Edward Bréza, prof. Jerzy Tréder, prof. Brunon Sënôk i Eugeniusz Gòłąbk. Òd warkòwi starnë nagraniô dozérô Ewa Kania. Szefã produkcjë je Adam Wieluńsczi.