CZWIÔRTK
ANTIFONA NA WEŃDZENIÉ
Przër. Ps 119 (118), 151-152.
Wë jesce bliskò, ò Panie, * i wszëtczé Wasze przëkôzania są prôwdą. * Òd dôwna jô wiém ze słów Waszëch, * że Wë trwôce na wieczi.
KÒLEKTA
Wszëtkòmògący Bòże, pòdskacë naje sërca do przëszëkòwaniô dróg Twòjémù Jednorodzonémù Sënowi, * żebë jesmë dzãka Jegò przińdzenimù mòglë Cë służëc w czëstoscë dëszë. Przez najégò Pana Jezësa Christusa.
PIERSZÉ CZËTANIÉ
Iz 41, 13-20
Bóg je òdkùpicelã.
Czëtanié z Knédżi proroka Izajasza.
Jô, Pón, twój Bóg, ùjął jem cebie za prawą rãkã a rzekł tobie: „ Nie lãkôj sã, Jô przëchòdzã cë z pòmòcą „. Nie bój sã, robôczkù, Jakùbie, niebòrôkù Izraelu! Jô cebie wspòmôgóm, mówi Pón, òdkùpicél twój, Swiãti Izraela. Hewò Jô przemieniwóm cebie jakbë w sanie do draszowaniô, nowé z pòdwójną régą zãbów: Të wëdraszëjesz i wëkruszisz górë, a zmienisz grzëpë w drobną seczkã.
Të je przeharfùjesz, a wiater je ùniese i wichier szôlony je pòrozsëpie. A zôs të rozredëjesz sã w Panu, mdzesz sã bùsznił Swiãtim Izraela. Ti nãdzny i biédny szukają wòdë, a ji ni ma! Jich jãzëk ju ùsychô z pragniączczi. Jô, Pón, wësłëchóm jich, nie òpùszczã jich Jô, Bóg Izraela.
Dóm wëpłënąc strëmienióm na nadżich górach i zdrzódłóm wòdë na westrzódkù niżawów. Pùstinią Jô zamieniã w jezora, a wëschłą zemiã na wòdów zdroje. Na pùstini Jô zasadzã cedrë, akacëje, mërtë i òléwczi; na trôwiastëch rówiznach rozkòscérzã kòle se cyprisë, wijądżi i bùksówc. Żebë widzelë i pòznelë, rozmëslëlë so i przerozmielë wszëtcë, że rãka Pana to sprawiła, że Swiãti Izraela to stwòrził.
To je słowò Bòżé.
PSALM RESPONSORIJNY
Ps 145 (144)
Refren: Pón je łagódny i baro łaskawi.
Jô mdã Was wielbił, Bòże mój i Królu, *
i sławił Wasze miono przez wszëtczé wieczi.
Kòżdégò dnia jô mdã Was błogòsławił *
i na wieczi wësłôwiôł Wasze miono.
Refren.
Niech Was wielbią, Panie, wszëtczé Wasze dokazënczi *
i niech Was błogòsławią wszëtcë Waszi swiãti.
Niech mówią ò chwale Waszégò królestwa *
i niech głoszą Waszã pòtãgã.
Refren.
Żebë òbznajmic sënóm lëdzczim Waszã pòtãgã
i pësznotã chwałë Waszégò królestwa.
Wasze królestwò je królestwã wszëtczich wieków, *
przez wszëtczé pòkòlenia Wasze panowanié.
Refren.
SPIÉW PRZED EWANIELËJĄ
Iz 45, 8
Alleluja, alleluja, alleluja.
Nëże, niebò, spùscë te sprawiedlëwégò, jak rosã,
niech jak deszcz spłënie z blónów,
niech sã òtemknie zemia i Zbawicela zrodzy.
Alleluja, alleluja, alleluja.
EWANIELËJÔ
Mt 11, 11-15
Ni ma wikszégò człowieka òd Jana Chrzcëcela.
Słowa Ewanielëji wedle swiãtégò Mateusza.
Jezës rzekł do lëdztwa: „ Pò prôwdze, pòwiôdajã wama: Midzë narodzonyma z białk nie pòwstôł wikszi òd Jana Chrzcëcela. Ale nômniészi w niebiesczim królestwie je wikszi jak òn. A òd czasu Jana Chrzcëcela jaż donąd niebiesczé królestwò doznôwô gwôłtu i gwôłtowny lëdze do niegò sã cësną. Bò wszëtcë Prorocë i Prawò prorokòwelë jaż do Jana. A żelë chceta przëjimnąc, to òn je nym Elijaszã, jaczi mô przińc. Chto mô ùszë, niech słëchô”.
To je słowò Pańsczé.
Mòdlëtwa wiérnëch
MÒDLËTWA NAD DARAMA
Panie, nasz Bòże, przëjimnijce ne darë, jaczé jesmë dostelë dzãka Waszi dobrocë, + Wë nama je delë, żebë jesmë mòglë òdprawiac eucharisticzną Òfiarã, * sprawice, żebë òna sã stała dlô nas zadôwkã wiecznégò zbawieniô. Przez Christusa, Pana najégò.
Prefacjô nr 1
ANTIFONA NA KÒMÓNIÃ
Tt 2, 12-13
Żijmë na nym swiece sprawiedlëwie i pòbòżno, * żdżącë błogòsławiony nôdzeji i òbjawieniô sã chwałë wiôldżiégò Bòga.
MÒDLËTWA PÒ KÒMÓNII
Bòże, nasz Òjcze, niech brzadny bądze nasz ùdzél w nym Sakrameńce, + przez jaczi nas, pielgrzimùjącëch na zemi, pòdtrzimùjesz w drodze do nieba * i ùczisz całim sërcã miłowac to, co je wieczné. Przez Christusa, Pana najégò.
|
