PIĄTK
ANTIFONA NA WEŃDZENIÉ Hewò Pón przińdze w majestace, * żebë przëniesc pòkój swòjémù lëdowi * i òbdarzëc gò żëcym wiecznym.
KÒLEKTA Wszëtkòmògący Bòże, sprawi, żebë jesmë z wiôlgą czujnotą żdelë na przińdzenié Twòjégò Sëna + i wiérny pòùczenióm najégò Zbôwcë * wëszlë Jemù na przódk z widã wiarë i miłotë. Przez najégò Pana Jezësa Christusa, jaczi żëje i królëje na wieczi wieków.
PIERSZÉ CZËTANIÉ Iz 48, 17-19 Czejbë Izrael sã trzimôł Bòżëch przëkôzaniów, nie béłbë òdrzucony.
Czëtanié z Knédżi proroka Izajasza. Tak mówi Pón, twój Òdkùpicél, Swiãti Izraela: „ Jô jem Pón, twój Bóg, jaczi pòùczô cebie ò tim, co je pòżëteczné i czerëje tobą na drodze, jaką të kroczisz. Ó, czejbë të tak dôwôł bôczenié na mòje przëkôzania, tej twój ùbëtk bë sã stôł jak rzéka, a sprawiedlëwòta twòja jak mòrzczé wałë. Twòji nastãpnicë bë bëlë jak piôsk, ë jak jegò zôrenka twòje latorózdżi. Nigdë bë nie bëło ùsënioné ani wëmazóné twòje miono sprzed mòjégò òbliczô!”
To je słowò Bòżé.
PSALM RESPONSORIJNY Ps 1 Refren: Chto za Wami jidze, dostónie wid żëcô. Błogòsławiony je człowiek, co nie jidze za radą niegòdzëwëch, + na drogã grzészników nie wchòdzy * i z wëszczércama do grëpë nie sôdô, ale w Prawie Pana mô ùlubienié * i rozmiszlô so nad nim w dzéń i òb noc.
Refren.
Òn je jak drzéwiã zasadzoné nad płënącą wòdą, * co brzôd rodzy w swòjim czasu, jegò lëstë nie wiãdną, * a wszëtkò, co robi je szëkòwné.
Refren.
Z grzésznikama je jinaczi: * ny są jak plewa, chtërnã wiater rozmiôtô. Bò znónô je Panu droga sprawiedlëwëch, * a droga nëch niegòdzëwëch zadżinie.
Refren.
SPIÉW PRZED EWANIELËJĄ Alleluja, alleluja, alleluja.
Przińdze Pón, Ksąże ùbëtkù, wińdzëta na przódk Jemù.
Alleluja, alleluja, alleluja.
EWANIELËJÔ Mt 11, 16-19 Ti, co òdrzucëlë Jana Chrzcëcela, nie przëjimną Christusa.
Słowa Ewanielëji wedle swiãtégò Mateusza. Jezës rzekł do lëdztwa: „ Do kògò Jô móm przërównac no pòkòlenié? Òno szlachùje za dzecama, co sedzą na rénkù a przëgôdiwają drëdżim: "Më wama przëgriwelë, a wa nie tuńcowała; më sã żalëlë, a wa nie chlëchała". Bò przëszedł Jan; nie jôdł ani nie pił, a òni mówią: "Złi duch gò òbsamãtôł". Przëszedł Człowieczi Syn, jé ë pije, a òni mówią: Wejle òbżartélc i pijôk, kamrôt celników ë grzészników". Równak mądrosc je ùsprawiedlëwionô przez swòje czënë „.
To je słowò Pańsczé.
Mòdlëtwa wiérnëch
MÒDLËTWA NAD DARAMA Wszëtkòmògący Bòże, dôj sã przebłagac naszima pòkórnyma mòdlëtwama i òfiarama, + a dlôte, że më ni mómë zasłëgów, jaczé mògłëbë nas ùsprawiedlëwiac przed Tobą, * wspòmòżë nas swòją łaską. Przez Christusa Pana najégò.
Prefacjô nr 1
ANTIFONA NA KÒMÓNIÃ Przër. Flp 3, 20-21 Spòdzéwómë sã przińdzeniô Zbawicela, Jezësa Christusa, * chtëren przejinaczi najé smiërtelné cało * na pòdobã swégò, ùwielbionégò cała.
MÒDLËTWA PÒ KÒMÓNII Pòkrzésony ną dëchòwą Strawą, pòkórno błagómë Cã, Bòże, + sprawi, żebë jesmë przez ùdzél w Eucharistëji naùczëlë sã mądrze szacowac doczasné dobra * i miłowac dobra wieczné. Przez Christusa, Pana najégò.
|