CZWIÔRTK
ANTIFONA NA WEŃDZENIÉ
Ps 119 (118), 151-152
Wë jesce bliskò, Panie, * i wszëtczé Wasze przëkôzania są prôwdą. * Òd dôwna jô wiém ze słów Waszëch, * że Wë trwôce na wieczi.
KÒLEKTA
Wszëtkòmògący Bòże, Twòjima niewôrtnyma słëgama më jesmë + i zasmùcywô nas mësl ò naszëch grzéchach, * prosymë Cebie, żebë jes napełnił nas redoscą z przińdzeniô Twòjégò Sëna, jaczi z Tobą żëje i królëje na wieczi wieków.
PIERSZÉ CZËTANIÉ
Iz 54, 1-10
Pón Bóg dotrzëmiwô Ùgòdë.
Czëtanié z Knédżi proroka Izajasza.
Spiewôj z redoscë, të, nierodnô, co jesz ni môsz rodzoné, krzikôj z ùcechë, të, co ni môsz zaznóné bólów pòrodu!Bò wicyj je sënów ti, pòrzucony nigle sënów ti, co mô chłopa, mówi Pón. Rozszërzë rum pòd twòjim telcã, rozcygni płótna twòjégò mieszkaniô, nie strzëmiwôj sã, wëdłëżë twòje pòwrózczi, wbij twòje pôlëczi.
Bò të sã rozroscesz na prawò i lewò a twòji nastãpnicë mdą mielë pòd sobą nôrodë i zalëdzą òpùszczoné miasta. Nie lãkôj sã, bò të ju sã nie zawstidzysz, nie sromòcë sã, bò të sromòtë ju nie zaznajesz. Bò zabôczisz ò wstëdzë twòji młodoscë. I nie wspòmnisz ju sromòtë twòjégò gdówstwa. Kò twój Stwòrzëcél, jaczégò miono je "Pón Zôstãpów" je twòjim Slëbnikã; twòjim Òdkùpicelã je Swiãti Izraela, zwóny Bògã całi zemi.
Pò prôwdze, jakno niastã pòrzuconą i zgnãbioną na dëchù, wezwôł cebie Pón. I jakbë do swòji białczi, pòrzucony w młodëch latach mówi twój Bóg: „Na krótczi sztërk jem cã pòrzucył, ale z wiôlgą miłotą cebie przëgarnã. Czej Jô miôł górz, tej ukrił jem przed tobą na krótkò mòje òbliczé, ale we wieczny miłoce Jô sã nad tobą ùlëtowôł, mówi Pón, twój Òdkùpicél.Bò ze Mną je tak, jakno za dni Noégò, czej Jô przësyg, że wòdë Noégò ju nigdë nie spadną na zemiã; tak terô przësygóm, że sã nie rozgòrzã na cebie ani ce nie mdã gromił. Bò górë mògą sã rozstãpic i pagórczi zatëmlowac, ale mòja miłota nie òdstąpi òd ce i sã nie zachwieje mòja ùgòda pòkòju „, mówi Pón, chtëren mô nad tobą zmiłowanié.
To je słowò Bòżé.
PSALM RESPONSORIJNY
Ps 30 (29)
Refren: Jô Was, Panie sławiã, bò Wë miã wëbawilë.
Sławiã Was, Panie, bò Wë miã wëbawilë *
i jesce nie delë mòjim niedrëchóm sã ze mie wësmiewac.
Panie, mój Bòże,Wë z krôjnë ùmarłëch przëwòłelë mòjã dëszã *
i jesce ùretelë mie żëcé spòmidzë tëch, co schòdzą do grobù.
Refren.
Spiewôjta psalm wszëtcë, co miłujeta Pana *
i pamiãtôjta ò swiãtosce Jegò.
Bò Jegò górz trwô leno sztëruszk, +
a Jegò łaska całé żëcé. *
Płacz nadchôdô wieczór, a pòrenë redosc.
Refren.
Wësłëchôjce miã, Panie, zmiłujce sã nade mną *
Bądzce mòją pòmòcą, Panie.
Wë zmienilë w tuńc mòjã żałobną skargã. *
Bòże mój i Panie, jô mdã Was sławił na wieczi.
Refren.
SPIÉW PRZED EWANIELËJĄ
Łk 3, 4.6
Alleluja, alleluja, alleluja.
Przëszëkùjta drogã Panu, proscëta Jemù stegnë;
wszëtcë lëdze ùzdrzą Bòżé zbawienié.
Alleluja, alleluja, alleluja.
EWANIELËJÔ
Łk 7, 24-30
Jan szëkùje drogã Christusowi.
Słowa Ewanielëji wedle swiãtégò Łukasza.
Czej pòsłańczicë Jana òdeszlë, Jezës jął prawic do lëdztwa ò Janie:
„Co wa wëszła òbzerac na pùstini? Strzënã, co sã tëmlëje na wietrze? Ale co wa wëszła òbaczëc? Człowieka òblokłégò w mitczé ruchna? Hewò w królewsczich pałacach mieszkają ny, co noszą kòsztowné òbleczenia ë żëją w bògactwie.
Ale co wa wëszła òbaczëc? Proroka? Jo, mówiã wama, jesz cos wicy jak proroka. Òn je nym, ò jaczim je napisóné: Hewò sélajã mòjégò pòsłańczika przed Tobą, żebë Cë przëszëkòwôł drogã. Pòwiôdajã wama: Midzë narodzonyma z niastów ni ma wikszégò òd Jana. Ale nômniészi w Bòżim królestwie je wikszi jak òn”. Całé lëdztwò, co Gò słëchało, a nawetk celnicë ùznôwelë Bòżąsprawiedlëwòtã, bò przëjãlë òd Jana chrzest. A farizeuszowie ë ùczałi w Prawie nie dopùscëlë do zjisceniô sã Bòżégò zamëslënkù ò nich, bò nie przëjãlë òd niegò chrztu.
To je słowò Pańsczé.
Mòdlëtwa wiérnëch
MÒDLËTWA NAD DARAMA
Panie, nasz Bòże, przëjimnijce ne darë, jaczé jesmë dostelë dzãka Waszi dobrocë, + Wë nama je delë, żebë jesmë mòglë òdprawiac eucharisticzną Òfiarã, * sprawice, żebë òna sã stała dlô nas zadôwkã wiecznégò zbawieniô. Przez Christusa, Pana najégò.
Prefacjô nr 1
ANTIFONA NA KÒMÓNIÃ
Tt 2, 12-13
Żijmë na nym swiece sprawiedlëwie i pòbòżno, * żdżącë błogòsławiony nôdzeji i òbjawieniô sã chwałë wiôldżégò Bòga.
MÒDLËTWA PÒ KÒMÓNII
Bòże, nasz Òjcze, niech brzadny bądze nasz ùdzél w nym Sakrameńce, + przez jaczi nas, pielgrzimùjącëch na zemi, pòdtrzimùjesz w drodze do nieba * i ùczisz całim sërcã miłowac to, co je wieczné. Przez Christusa, Pana najégò.
|
